La partida che ha da giubilar è oz definitivamain la PPS, quai munta dentant: il temp sco partida d’opposiziun, quel è passà?
La PPS ha propi gronds motivs da far festa oz. Sper il sez en la regenza è il resultat dal Cussegl grond, schon fitg remartgabel. Els fan il sigl da 25 sin 35 sezs e daventan cleramain la gronda fracziun en il parlament grischun. Che la PPS gudognia sezs, quai è stà da spetgar. In gudogn da 10 sezs è tenor mai in terratrembel politic.
Co decleras ti quest success da la PPS?
La PPS è ida en il cumbat cun 120 candidatas e candidats. Pia, en mintga circul han els gì tants candidats e candidatas sco sezs ed uss gioga il sistem electoral ina rolla – il sistem da proporz. I dovra simplamain bleras vuschs da partida per gudagnar sezs. Vitiers vegn la votaziun federala, Na ad ina Svizra da 10 milliuns che ha segir gidà da mobilisar la basa da la PPS.
Quai ch'è reussì a la PPS n'è betg reussì al Center e n'è era betg reussì als liberaldemocrats. Ensemen perdan els exact quels 10 sezs che la PPS gudogna. Al Center ed a la PLD n'èsi betg reussì da transportar in messadi en il cumbat ed era betg da mobilisar avunda.
Nov è era ch'ils verds han per l'emprima giada fermezza da fracziun en il Grischun. Co e quai da valitar?
Era quai è in grond success per ils verds. Els han decidì dad ir l’atgna via en quest cumbat, betg ensemen cun ils socialdemocrats, quella strategia avess era pudì ir en las chautschas. Quai n'è ella dentant betg – els vegnan sin set sezs e vegnan uschia er onurads per lur curaschi.
Valentin Schmed
Manader actualitad RTR