Las votantas ed ils votants svizzers na vulan betg franar l'immigraziun talmain sco l'iniziativa da la Partida populara svizra che vuleva che la populaziun svizra na creschia betg sur 10 milliuns avant il 2050. L'iniziativa «Na ad ina Svizra da 10 milliuns» è vegnida refusada cun 54,8%.
Ils chantuns ch'èn stads il pli ferm cunter l'iniziativa èn quels da la Svizra franzosa ensemen cun ils dus chantuns Basilea, Berna e Lucerna. Cun excepziun da la Schaffusa, Turitg, Zug, ed il Grischun han tschels chantuns approvà la fatschenta.
Il Cussegl federal ed il parlament èn ordavant s'exprimids cunter l'iniziativa.
Il Grischun di Na
Las Grischunas ed ils Grischuns refusan l'iniziativa «Na ad ina Svizra da 10 milliuns», quai cun 51,49% da las vuschs.
Il pli grond sustegn en Grischun ha l'iniziativa survegnì da la vischnanca da Furna, nua che prest 78% da las vuschs èn s'exprimidas per l'intent. La pli gronda cumpart da vuschs cunter limitar il dumber da la populaziun svizra vegn cun 65% da Val.
Iniziativa Na ad ina Svizra da 10 milliuns, resultat grischun
Resultat
La participaziun a la votaziun ha en Grischun muntà a 59,42%.
Quai vul l'iniziativa «Na ad ina Svizra da 10 milliuns!»
Anc ils onns 80 vivevan var 6,4 milliuns persunas en Svizra. Dapi lura è la populaziun residenta permanenta creschida cuntinuadamain. La fin da l'onn 2025 ha l'Uffizi federal da statistica dumbrà passa 9,1 milliuns umans en Svizra. D'ina vart è la populaziun svizra creschida. En proporziun è il dumber da las persunas immigradas dentant creschì pli fitg. Per onn immigreschan actualmain netto var 80'000 persunas da l'exteriur, en emprima lingia dals pajais da la Uniun europeica.
Quest svilup vul la PPS franar cun l'iniziativa. Avant il 2050 na duai la populaziun svizra betg crescher sur 10 milliuns persunas. N'avessan las mesiras dal Cussegl federal e parlament betg da tanscher stuess la Svizra tenor l'iniziativa la finala disdir la cunvegna davart la libra circulaziun da persunas cun l'UE.