La midada da l'armada en il servetsch civil vegn engrevgiada. Ils votants svizzers han approvà la midada da la lescha da servetsch civil cun 52,5%.
Grondas parts da la Svizra franzosa han dentant ditg Na a la refurma. Pli lunsch en l'ost ch'ins guarda e pli cler che la populaziun ha approvà la midada da la lescha – suletta excepziun è il chantun da Turitg:
Grischun di cleramain Gea
Grischunas e Grischuns acceptan cleramain la midada da la lescha davart il servetsch civil. Cun stgars 60% Gea.
Sulettamain las vischnancas da Masein (55%) e da St. Maria en Calanca (≈52%) refusà l'adattaziun da la lescha, tut tschellas han dà glisch verda. Il pli ferm sustegn vegn cun bun 79% da la vischnanca da Schmitten.
Midada da la lescha davart il servetsch civil, resultat grischun
Resultat
La participaziun a questa votaziun è stada auta en il Grischun cun bunamain 58%.
Tge less il project?
Il project per midar la lescha davart il servetsch civil vul garantir ch'il servetsch civil restia vinavant in'excepziun e na vegn betg duvrà sco alternativa al servetsch militar. Cussegl federal e parlament vulan che damain commembers da l'armada midan en il servetsch civil, cunzunt tals ch'han gia prestà ina gronda part da lur servetsch militar.
Gist suenter l'introducziun dal servetsch civil il 1996 faschevan mintg'onn in pèr tschients fin maximalmain 2'000 persunas diever da la pussaivladad da midar en quel. Ozendi midan en media 6'000 persunas obligadas da prestar servetsch, mintg'onn dal servetsch militar en il servetsch civil. Radund in terz da quellas suenter ch'ellas han gia prestà ina part dal servetsch militar.