Suenter l'introducziun dal servetsch civil il 1996 faschevan mintg'onn mo paucs tschients fin maximalmain 2'000 obligads da far servetsch diever da questa pussaivladad.
Suenter l'aboliziun da l'examen da conscienza (Gewissensprüfung) il 2009 èn las cifras creschidas fermamain: oz midan en media radund 6'000 persunas ad onn en il servetsch civil, il 2025 eran quai cun 7'211 uschè bleras sco anc mai. Radund in terz da las persunas admessas da nov avevan da quest temp gia prestà ina part dal servetsch militar.
Actualmain èn passa 60'000 persunas engaschadas tar il servetsch civil.
Quai duai sa midar
Il project per midar la lescha davart il servetsch civil vul garantir ch'il servetsch civil resta vinavant in'excepziun e na vegn betg duvrà sco alternativa al servetsch militar. Cussegl federal e parlament vulan che damain commembers da l'armada midan en il servetsch civil, cunzunt tals ch'han gia prestà ina gronda part da lur servetsch militar.
Cun reglas pli severas ed almain 150 dis da servetsch civil duai vegnir impedì ch'il servetsch civil vegn percepì sco pli simpel u pli attractiv ch'il servetsch militar. Cunter questa midada è vegnì prendì il referendum, perquai va la fatschenta en votaziun.
Tge din ils adversaris?
Ina allianza cumbatta la revisiun da la lescha da servetsch civil cun in referendum. Ella avertescha d'ina reducziun massiva dals servetschs civils che sajan indispensabels cunzunt en chasas da tgira, ospitals, scolas, en la protecziun da la natira sco er en l'agricultura.
Part da l'allianza fan ils Giuvens Verds, da l'Uniun svizra per il servetsch civil Civiva, la PS, ils Verds, la PVL, la Gruppa per ina Svizra senza armada e l'Uniun da purs pitschens.
La revisiun da la lescha spaventia persunas giuvnas da s'engaschar en la societad senza rinforzar l'armada. Armada e servetsch civil sajan omadus necessaris; in servetsch civil flaivlentà mainia a largias tar chantuns, vischnancas e manaschis d'acziun e produceschia damain engaschi enstagl da dapli schuldada.
