Anc ils onns 80 vivevan var 6,4 milliuns persunas en Svizra. Dapi lura è la populaziun residenta permanenta creschida cuntinuadamain. La fin da l'onn 2025 ha l'Uffizi federal da statistica dumbrà passa 9,1 milliuns umans en Svizra. Per onn immigreschan actualmain netto var 80'000 persunas da l'exteriur, en emprima lingia dals pajais da la Uniun europeica.
Er la populaziun svizra è creschida, tras ina quota da naschientschas positiva e tras natiralisaziuns. En proporziun è il dumber da las persunas immigradas dentant creschì pli fitg. La fin dal 2025 èn prest 28% da la populaziun permanenta estras ed esters, bun 72% han in pass svizzer.
Tge vul l'iniziativa?
L'iniziativa pretenda d'agiuntar a la Constituziun federala in nov artitgel per in svilup persistent da la populaziun. L'iniziativa prevesa diversas mesiras per betg laschar crescher la populaziun en Svizra sur 10 milliuns avant l'onn 2050. Uschia duain il Cussegl federal ed il parlament prender mesiras uschespert che dapli che nov milliuns e mez persunas abiteschian en Svizra.
Sche quellas mesiras na tanschan betg per tegnair en la limita, stuess la Svizra sco frain d'urgenza la fin finala desdir la cunvegna davart la libra circulaziun da persunas cun l'UE.
Tge din ils adversaris?
Tenor il Cussegl federal pericliteschia l'iniziativa or da las retschas da la Partida populara svizra la via bilaterala cun l'Uniun europeica. Ils chantuns refuseschan medemamain l'iniziativa. Els averteschan che firmas, chasas da tgira ed ospitals na pudessian betg recrutar simpel persunal or da l'UE. Quai tutgass sco emprim las regiuns ruralas.
Er la regenza grischuna è cleramain cunter l'iniziativa per ina Svizra da 10 milliuns. Quella pudess avair consequenzas gravantas – cunzunt pervi da la populaziun che daventa adina pli veglia.
Tar las grondas partidas stat be l'inizianta PPS davos questa fatschenta. Tut tschellas partidas èn s'exprimidas encunter.
Il Cussegl federal ed il parlament refuseschan l'iniziativa.
