La Partida populara svizra fa ina nova emprova per limitar l'immigraziun en Svizra. A Berna ha la PPS surdà 114'600 suttascripziuns per sia iniziativa «Nagina Svizra da 10 milliuns!». Ed entant ha la Chanzlia federala verifitgà las suttascripziuns, e l'iniziativa è gartegiada cun 14'000 suttascripziuns dapli che necessari.
Las suttascripziuns èn vegnidas rimnadas durant be 9 mais, scrivan ils iniziants. Quai mussia che l'immigraziun fetschia adina dapli quitads a la populaziun – uschia saja quella tranter auter er responsabla per la mancanza d'abitaziuns e l'augment dal tschains da locaziun, las stretgas sin las vias ed en il traffic public, la criminalitad e las pajas stagnondas.
L'iniziativa pretenda d'agiuntar a la constituziun in nov artitgel per in svilup persistent da la populaziun. L'iniziativa prevesa diversas mesiras per betg laschar crescher la populaziun en Svizra sur 10 milliuns avant l'onn 2050. Uschia duain il Cussegl federal ed il parlament prender mesiras uschespert che dapli che nov milliuns e mez persunas abiteschian en Svizra.
Sche quellas mesiras na tanschan betg per tegnair en la limita, stuess la Svizra sco frain d'urgenza la fin finala desdir la cunvegna davart la libra circulaziun da persunas cun l'UE.
Il 2022 ha la Svizra dumbrà ina populaziun residenta permanenta da circa 8,8 milliuns.
