Albula/Alvra
La vischnanca d'Albula/Alvra ha elegì Manuela Gebert ch'abita ad Alvagni Bogn sco nova presidenta communala. L'advocata ha survegnì 332 vuschs, ulteriuras 40 vuschs èn idas a singulas persunas. Gebert surpiglia l'uffizi il prim da schaner da Daniel Albertin.
Claustra
Il suveran da Claustra ha decis davart trais fatschentas communalas. Cun 891 vuschs è Hanspeter Ambühl vegnì elegì en la suprastanza communala per il rest da la perioda d'uffizi 2025 – 2028. L'elecziun è stada necessaria perquai che David Sonderegger ha demissiunà pervia d'in accident, scriva la vischnanca.
Plinavant ha il suveran approvà cleramain la revisiun parziala da la planisaziun locala (fasa III). Quella vul armonisar las leschas da construcziun da las anteriuras vischnancas da Saas e Claustra ad ina lescha unifitgada cun adattar plans da zonas e furmaziun. Cun las adattaziuns vegnan ils plans e la lescha adattadas a dretg surordinà.
Sco terz han ils da Claustra dà glisch verda ad in credit d'impegn da 13,1 milliuns francs per renovar la via da transport a Saas. I va per modernisar la rait da vias ed uschia pussibilitar a puras e purs da pudair cultivar a moda effizienta il terren agricul.
Cuira
Il suveran da la citad da Cuira ha acceptà cun passa 55% in scumond da fieus artifizials sin il territori da la citad. Quest scumond haja la finamira da proteger meglier la populaziun, animals e l'ambient. Concret vegnan scumandads fieus artifizials che fa canera, tals che fan pauca canera (sco vulcans) restan lubids. Organisaturs d'occurrenzas pon dumandar lubientschas, persunas privatas però betg.
Domat
Il suveran da Domat ha acceptà cleramain cun passa 69% la revisiun parziala da la planisaziun locala. Quella vul nizzegiar meglier quartiers existents e stgaffir dapli spazi d'abitar. Avant in onn aveva la revisiun fatg naufragi, questa giada han ils responsabels elavurà ina fatschenta pli pauc cumplexa. Il svilup dal quartier Tircal sco era la mobilisaziun dal terren da bajegiar sajan vegnids reducids.
Ilanz/Glion
Jaromir Kreiliger cumplettescha il parlament communal a Glion e succeda a Christian Caduff ch'ha demissiunà. Kreiliger ch'è senza partida ha survegnì 597 vuschs, ses adversari Tim Bürkli da la Partida liberaldemocratica ha recaltgà 422 vuschs. L'uffizi cumenza il prim da fanadur.
Lumnezia
Suenter Sursaissa va era la Lumnezia d’accord cun las investiziuns a favur dal turissem. Ils votants e las votantas da Lumnezia han approvà il credit da 3,9 milliuns francs agen chapital – sco era la garanzia da 7,5 milliuns per finanziaziuns tras bancas. Quai cun bunamain 59% vuschs Gea.
Avant aveva la radunanza communala da Lumnezia approvà questas investiziuns cun 75 cunter 3 vuschs. La gronda summa da questa emprima part dal masterplan «Enturn il Mundaun» è previsa per l’ennavaziun. Planisadas èn era ina senda tematica, ina tur da raiver ed offertas da bike.
Medel/Lucmagn
En la vischnanca da Medel/Lucmagn è la suprastanza communala puspè cumpletta. Las votantas ed ils votants han elegì Ciril Lutz da Matergia e Marina Morgenthaler da Curaglia sco gerau e geraua. Lutz ha survegnì 117 vuschs – Morgenthaler 104.
San Murezzan
A San Murezzan dovri in segund scrutini per eleger in nov presidi. Nagin dals trais candidats ha cuntanschì il pli absolut. Las bleras vuschs ha fatg Adriano Iseppi, per sia elecziun han mancà 59 vuschs. Il segund scrutini è ils 19 da fanadur 2026.
Il suveran da San Murezzan ha ditg Na ad in emprim credit per il project che vul revitalisar la riva dal Lai da San Murezzan, quai cun 865 vuschs Na cunter 636 vuschs Gea. L'idea dal project cun il num «Riva Viva» vul d'ina vart augmentar la valur turistica al lai ma er renaturalisar spazi da viver per animals. Il project ha en tut otg etappas, per mintgina ha il suveran pled en chapitel, sche tuttas vegnan acceptadas custa il project 13 milliuns francs, la realisaziun cuzza enfin il pli tard il 2031.
Tavau
Il suveran da Tavau ha acceptà in credit d'impegn da 6,52 milliuns francs. Cun quel duai vegnir sanà l'implant tecnic per illuminar ed ennavar la loipa da notg en il territori da Duchli/Mattastrasse a Tavau. L'infrastructura da la loipa da notg saja era memia veglia e sto vegnir sanada. La decisiun è crudada cleramain cun passa 75% Gea. La participaziun a l'urna è bunamain tar 60%.
Trimmis
Cun 70% da las vuschs han las votantas ed ils votants da Trimmis decidì da construir ina nova scolina dubla. Il suveran da Trimmis ha approvà il credit d’impegn necessari da 3,5 milliuns francs. Quel cumpiglia era d'engrondir il spazi da scola existent.
Tujetsch
Pascal Berther cumplettescha la suprastanza communala da Tujetsch. Ella è sa messa a disposiziun en il segund scrutini ed ha survegnì 298 vuschs, 52 vuschs èn idas ad ulteriuras persunas.
Tusaun
A Tusaun po l'ovra electrica Rheinau vegnir remplazzada cun in nov implant. Il suveran ha dà cun passa 91% cleramain ses consentiment a la revisiun da la planisaziun d'utilisaziun da l'ovra. I dovra la revisiun per insumma pudair adattar l'ovra Rheinau a pretensiuns tecnicas d'ozendi.
Val
Ils votants e las votantas da Val han approvà la revisiun da la planisaziun locala a la lescha surordinada, quai cun passa duas terzas da las vuschs. Elements centrals da la fatschenta èn la reducziun da zonas da construcziun surdimensiunadas, da promover da construir vers l'interiur sco er definir cundiziuns cleras pertutgant bajegiar, abitar, industria e turissem.
Vaz
La vischnanca da Vaz ha dà glisch verda per promover emprimas abitaziuns. Omaduas dumondas en quest connex èn approvadas cun var trais quarts da las vuschs. Ina dumonda è stada da crear ina fundaziun che promova spazi d’abitar per indigenas ed indigens. E la segunda da metter a disposiziun per il project ina parcella da bajegiar. La vischnanca burgaisa da Vaz aveva gia ditg Gea il mars passà al project.
Zezras
La vischnanca da Zezras survegn in scumond da fieus artifizials. Cun var 75% da las vuschs ha il suveran approvà l'introducziun. Questa fatschenta è vegnida en votaziun sin basa d'ina petiziun or da la populaziun.