Domat sto ir enavos a la partenza da l'ultima etappa da la revisiun parziala da la planisaziun locala. Quai suenter plirs onns per elavurar il project da votaziun che ha fatg naufragi a l'urna. In'autra opziun na datti betg – ina e scadina vischnanca dal Grischun è obligada da reveder sia planisaziun locala. Ina da las mesiras per ch'i possia proxima giada dar in Gea a l'urna è tenor il president communal Erich Kohler da parter las differentas tematicas en purziuns. Era dettia puncts ch'ins possia tractar independentamain. A Domat vegn pia las proximas emnas e mais surlavurà, adattà, discutà, sa participà, collavurà e declerà.
La finamira è d'elavurar in project da votaziun acceptabel per ina maioritad.
Sche tut va sco planisà po la segunda runda da participaziun per la populaziun avair lieu gia quest atun. L'entschatta dal 2026 è la segunada votaziun planisada. Sin lura vul Erich Kohler avair in project al qual ina maioritad po suandar. Il president communal Erich Kohler è da buna speranza ch'i vegnia a gartegiar da metter suttetg la revisiun l'entschatta da l'onn proxim.
Revisiun parziala ha fatg naufragi
Il suveran da Domat ha refusà la revisiun parziala da la planisaziun locala, quai cun 55,7% da las vuschs. Il focus da la fatschenta era da porscher dapli spazi da viver e quai cun nizzegiar meglier ils quartiers existents enstagl da crear novas zonas d'abitar. Tenor il messadi era l'idea dad uschia dar spazi ad in augment moderà da la populaziun. Era per manaschis vuleva la vischnanca uschia daventar pli attractiva, quai cun crear ina nova zona d'industria en il Vial e cun engrondir la zona d'industria existenta Paleu Sura.
Cun il Na al project ha il suveran da Domat decis il cuntrari dal cussegl communal ch'aveva gia approvà la revisiun parziala.
Surpraisa per il president communal
Il president communal, Erich Kohler è lezza giada stà surstà dal resultat. Sco quai ch'el ha ditg sin dumonda da RTR hajan els cun discurs e lavuratoris empruvà da tadlar ils desideris da la populaziun. El è persvas ch'ins haja en ils singuls puncts da revisiun er pudì resguardar ils basegns dad abitantas ed abitants, ma l'entira fatschenta cun temas davent da construir a moda pli concentrada enfin a midadas en la lescha da bajegiar saja stada bler.
La gronda quantitad da temas è stada ina gronda purziun.
Per Erich Kohler datti anc ina segunda raschun pussaivla per il naufragi, numnadamain la tema da la populaziun da crescher pli fitg. El di dentant er che la renfatscha da vulair betunar plain la cuntrada saja deplazzada.
Differents avis a Domat
I n'è betg l'emprima giada ch'il suveran decida cuntrari a las autoritads communalas. L'onn passà aveva la via da colliaziun dà da discutar a Domat. Il suveran ha approvà il credit per la «Colliaziun da vias sid-ost», la suprastanza ed il parlament da Domat eran però stads cunter il project.