L’incumbensa da l’Associaziun grischuna per il svilup dal territori è d'infurmar e sustegnair vischnancas en lur lavur en connex cun il svilup dal territori. Suenter lur radunanza annuala ha l’associaziun organisà perquai in'occurrenza publica. A quella ha il manader dal uffizi per il svilup dal territori dal chantun Grischun Richard Atzmüller infurmà nua che las lavurs stattan a reguard l’applicaziun da la lescha davart la planisaziun dal territori.
Mintga vischnanca è cumplettamain autonoma en la lavur e sto finalmain inoltrar tar il chantun propostas per diminuir la zona da fabrica ed era per mobilisar terren da fabrica en ils centers dals vitgs.
Ils temas èn enorm individuals tar mintga vischnanca. Dapi 10 onns, suenter la votaziun federala l’onn 2013 èn ins vidlonder. Richard Atzmüller sperescha che en radund 5 onns hajan radund 80% da las vischnancas realisà la planisaziun dal territori.
Co-presidi al timun da l’associaziun
Avant l’occurrenza publica ha gì lieu la radunanza annuala da l’Associaziun grischuna per il svilup dal territori. A quella èn vegnidas elegidas Gabriela Binkert-Bechetti presidenta communala da Müstair e Barbara Aeschbacher presidenta da la vischnanca da Segl en furma dad in co-presidi. L'anteriur president e cusseglier naziunal Roman Hug ha dà giu quest uffizi a las duas dunnas nov elegidas.
