Siglir tar il cuntegn

Header

audio
Domat di Gea a la via da colliaziun
Or da Actualitad dals 22.01.2024. Maletg: RTR
laschar ir. Durada: 4 minutas 14 Secundas.
cuntegn

Domat Gea a la nova via da colliaziun

Cun 1'243 Gea encunter 1'180 vuschs Na ha il suveran da Domat approvà il credit per la «Colliaziun da vias sid-ost». Il credit da 2,4 milliuns francs per la «Colliaziun da vias sid-ost» ha muventà ed animà las discussiuns a Domat.

plan der strassenverbindung südost
Legenda: La colliaziun da vias sid-ost che ha procurà per discussiuns en giassas, gasettas ed uffizis. messadi da votaziun / domat

Cumenzà avevan las discussiuns avant passa in onn, cura che la populaziun da Domat ha approvà l'iniziativa per la colliaziun da vias sid-ost – e quai cun 52% da las vuschs. En las giassas e gasettas è la discussiun cuntinuada er anc suenter che la suprastanza ha elavurà ina proposta per ina colliaziun. Il comité per la via da colliaziun è cuntent cun il resultat da votaziun. Era sche 51,3% è in resultat cnap, saja il Gea cler per els.

Nus avain gì 1'100 suttascripziuns per l’iniziativa nua che mo 300 fissan stadas necessarias. Alura avain nus gudagnà la votaziun da l’iniziativa ed ussa era la votaziun davart il credit.
Autur: Lukas Kühne comité per la via

Suprastanza e parlament da Domat èn stads encunter il project. Tenor els fissi bajegià ina via quasi «sin reserva». Ed ultra da quai duvrassi lubientschas spezialas per construir la via tras ina zona agricula – e quai per ina via frequentada mintga di da 1'100 autos, uschia la vischnanca. Ils iniziants han però fatg valair ch'ins veglia distgargiar las vias da quartier dal traffic ed al transferir a la periferia dal vitg.

Il pievel ha ditg Gea ed uschia instradescha la vischnanca quest process. Sco emprim sto la vischnanca dar il permiss da fabrica. Suenter sto era il chantun esser d’accord, cunquai che la via fiss en la zona d’agricultura, pia ordaifer la zona da fabrica. Sch’il chantun vegn ad esser d’accord – metta il president communal da Domat dentant en dumonda. Il chantun haja ditg cleramain ch’el dettia mo la lubientscha sch'i dettia in basegn. E quest basegn saja relativ pitschen. Tuttina haja la populaziun da Domat ditg dus giadas gea – uschia ch’il chantun vegnia ad examinar la lubientscha a moda fitg precauta. Plinavant spetga il president communal da Domat ch'i vegn a dar recurs encunter il project. 

video
Domat ha ditg Gea al credit per via da sviament. Che quella vegn propi bajegiada n'è dentant anc adina betg cler.
Or da Telesguard dals 22.01.2024.
laschar ir. Durada: 4 minutas 4 Secundas.

Autra iniziativa sco opziun

Il comité encunter la via da colliaziun accepta questa decisiun. Tenor Alain Fischer spetgan els sin la decisiun dal Chantun e decidan tut tenor l’argumentaziun sch’els fan recurs u betg. Per els resta il traffic a Domat impurtant ed actual. Els considereschan da lantschar in'iniziativa per reducir il traffic da vacanzas e traffic da guntgida. La via da colliaziun na contribueschia nagut a questa problematica, manegia Alain Fischer.

Or da l'archiv:

video
540 meters dattan da discutar a Domat
Or da Telesguard dals 10.01.2024.
laschar ir. Durada: 3 minutas 42 Secundas.

Renovar ed engrondir cumplex da scola «Tircal»

Era ditg Gea han ils da Domat a la renovaziun dal cumplex da scola «Tircal» che duai vegnir sanà ed engrondì. Ils tschintg bajetgs dal cumplex duain vegnir sanads energeticamain. Previs èsi da far quai en etappas ils proxims trais onns en il rom d'in credit total da stgars 3,8 milliuns francs.

Ils bajetgs sajan energeticamain anc sin il stan ch'els eran vegnids bajegiads – la chasa da scola e la halla da gimnastica dateschan dal 1948 – e na correspundian betg a las pretensiuns actualas, scriva la vischnanca en il messadi.

RTR novitads 14:00

Artitgels legids il pli savens