Siglir tar il cuntegn

Header

video
540 meters dattan da discutar a Domat
Or da Telesguard dals 10.01.2024.
laschar ir. Durada: 3 minutas 42 Secundas.
cuntegn

Domat Credit da 2,4 milliuns per la via da colliaziun

Suenter il Gea da la populaziun a l'iniziativa per la via da colliaziun vegn ils 21 da schaner votà davart il credit da 2,4 milliuns francs per la realisaziun.

Ils 27 da november 2022 ha il suveran da Domat acceptà l'iniziativa per la via da colliaziun sid-ost cun 52% da las vuschs. La tematica polarisescha a Domat. Adina puspè datti da leger brevs da lecturs en la gasetta. Quai da la vart per la via, dentant er da quels ch'èn cunter la nova colliaziun sid-ost a l'ur da la vischnanca da Domat.

L'argument principal da la cuminanza d'interess PRO è che las vias da rimnada en ils quartiers duain vegnir distgargiadas dal traffic. Il traffic duess vegnir manà a l'ur dal vitg. Quest argument na laschan ils adversaris dentant betg valair – las vias da rimnada en ils quartiers dovrian maximalmain la mesadad da la capacitad. La cuminanza d'interess CONTRA di, ch'i na duess betg vegnir bajegià vias sin «reserva».

audio
Pro e contra da la via da colliaziun a Domat
ord Actualitad dals 10.01.2024. Maletg: RTR
laschar ir. Durada: 4 minutas 39 Secundas.

Obstachels pudessan restar

Ils 21 da schaner voteschan ils da Domat davart il credit da 2,4 milliuns per la via da colliaziun sid-ost. Sch'il suveran da Domat avess da dir Gea al credit fiss il proxim pass ina lubientscha da bajegiar da la vischnanca. E perquai che la via da colliaziun è en la zona d'agricultura è er il consentiment dal chantun necessari. Era sch'ils da Domat avessan da dir Gea al credit na fissan pia anc betg tut ils obstachels surmuntads. La pussaivladad da far recurs cunter il project resta vinavant.

Garantì è dentant, che la via da colliaziun sid-ost resta en la planisaziun locala, era sch'ella n'avess actualmain betg da vegnir realisada. Quai grazia al Gea a l'iniziativa, ils 27 da november 2022.

audio
Tge di la populaziun da Domat sur da la via da colliaziun?
ord Actualitad dals 10.01.2024. Maletg: RTR
laschar ir. Durada: 1 minuta 51 Secundas.

Las organisaziuns d'ambient

L'Associaziun per traffic ed ambient, VCS, prenda posiziun cunter la via perquai ch'ella destruiss funs fritgaivel. Plinavant vul il VCS promover il traffic plaun da velo. Recurs na pon els dentant betg far perquai ch'els n'han betg il dretg da far recurs d'associaziuns.

La Pro Natura na prenda betg posiziun en chaussa. Ma ella fa attent che la via planisada giess tras in terren che n'è betg relevant nà da la biodiversitad perquai ch'i se tracta da terren fritgaivel e cultivabel.

plan
Legenda: Vischnanca da Domat

Tant la suprastanza da Domat sco era il parlament refusan la nova via da colliaziun sid-ost. Il november da l'onn passà avevan 13 parlamentaris ditg Na al credit da passa 2,4 milliuns francs, be in parlamentari aveva approvà il credit. Ins na possia betg simplamain bajegiar vias sin reserva, argumentescha era la vischnanca. Quai saja cuntraproductiv era ord vista da l'agricultura perquai che sch'il suveran avess d'approvar il credit duvrass quai ina dumonda da construcziun a la vischnanca ed era ina dumonda al chantun per la construcziun ordaifer la zona e l'acquist da terren agricul. Quai duvrass alura in mussament concret per il niz da la via e quel na saja anc betg dà cun in volumen da traffic quotidian d'in zic dapli che 1'100 autos.

RTR actualitad 17:00

Artitgels legids il pli savens