Siglir tar il cuntegn

Header

audio
Il sviament a Domat dat da discutar avant las votaziuns
Or da Actualitad dals 18.11.2022. Bild: RTR
laschar ir. Durada: 3 minutas 31 Secundas.
cuntegn

Votaziuns dals 27 da november Datti ina nova via a Domat?

Ils 27 da november dastga Domat votar davart 2,4 milliuns per ina nova via a l’ur dal vitg. Quella colliass duas vias gia existentas. Il comité d'iniziativa less quella via per distgargiar las vias spezialmain pertutgadas. La suprastanza communala cusseglia dentant da metter in Na en l’urna.

Sch’ins guarda sin la carta da Domat vesan ins bain spert nua che la nova via da colliaziun vegniss bajegiada. Da la vart sut dals binaris colliass ella las duas vias existentas Via Musel e Via Sid.

Carta da Domat
Legenda: La via colliass la Via Musel (blau) cun la Via Sid (cotschen). map.geo.admin.ch, montascha RTR

Quella via è gia il passà stada pliras giadas in tema tals abitants e tar las abitantas da Domat. Adina puspè eran els persuenter e lura puspè encunter da bajegiar ella. Avant 10 onns ha il pievel lura decis da betg bajegiar la via. Quai saja stà in sbagl e là na sajan els betg stads activs avunda, di Giusep Blumenthal ch’è part dal comité d’iniziativa per la via. Persuenter han els quest onn rimnà passa 1'000 suttascripziuns per l’iniziativa.

Nus essan da l'opiniun ch'i dovra exnum quella via. Nus avain lantschà l’iniziativa perquai che nus na pudain betg pli supportar il traffic en il vitg.
Autur: Giusep Blumenthal iniziant ed abitant da Domat

Giusep Blumenthal abitescha dapi 23 onns a Domat e quai en ina da las vias ch'è pertutgada pli fitg ch’autras dal traffic. Cun la nova via da colliaziun fiss il traffic concentrà pli fitg sin l’ur da Domat ed uschia charrassan pli paucas persunas atras il vitg sez, da quai è el persvas.

Memia blers daners per quai che la via nizzegia

Insatgi ch’è da l'avis ch’il traffic na saja betg uschè problematics sco quai ch’il comité d’iniziativa pretendia è la suprastanza communala da Domat. Il president communal Erich Kohler di ch’els sajan gugent pronts dad intervegnir, dentant mo là nua ch'il traffic saja propi problematics. 2,4 milliuns saja memia bler perquai che la via vegness duvrada.

Be circa 8% da la populaziun nizzegiass quella via. Ils abitants dals quartiers tar la Via Quadras, Via Marchesa e Plaz Cumpogna.
Autur: Erich Kohler president communal da Domat

E perquai pudess ella era betg distgargiar il traffic en il vitg uschè fitg sco giavischà.

Dus ulteriurs quartiers planisads – ma tuttina nagin'investiziun per il futur

Enstagl d'ina nova via a l'ur da Domat pledescha el da duvrar pli savens il traffic public – cunzunt perquai ch'il bus circuleschia pli savens davent da l'auter mais. Quai cussegl na vegn dentant pli probabel betg a cuntentar Giusep Blumenthal ed il comité d'iniziativa. Cunzunt perquai ch'igl é planisà da bajegiar dus ulteriurs quartiers. Radund 800 persunas dapli abitassan lura a Domat. Per il president communal Erich Kohler n'é dentant era quai betg in motiv da bajegiar la via. Quai na saja betg in'investiziun che fetschia senn ed enfin ch'ils quartiers sajan bajegiads, giaja igl anc 20-25 onns. Sco emprim stoppian anc autras surfatschas da Domat vegnir surbajegiadas.

Na tar la via ma Gea tar l'ascensur tar il santeri

Davart in auter e pli char project dastga Domat era anc decider ils 27 da november. Numnadamain sch'i duai vegnir bajegià in ascensur per far pli accessibel il santeri a persunas cun impediments. Cun ils 3,7 milliuns che la suprastanza communala ha planisà per quai, duai era anc vegnir renovà la chaplutta da morts.

Na tar ina via per 2,4 milliuns che duai distgargiar il traffic, dentant Gea tar in credit da 3,7 milliuns per il santeri da Domat. Quai argumentescha Erich Kohler uschia che las abitantas ed ils abitants hajan in pli grond basegn per in santeri accessibel per tuts che per ina via da colliaziun che vegn be duvrada d'ina minoritad da la populaziun. Il davos pled han dentant uschè u uschia las abitantas ed ils abitants da Domat.

RTR actualitad 08:00

Artitgels legids il pli savens

Scrollar a sanestra Scrollar a dretga