Halla da chavaltgar a San Murezzan vegn betg sanada
Il suveran da San Murezzan ha refusà il credit da 15,3 milliuns francs per sanar la halla da chavaltgar sper il lai. Prest 52% da las vuschs suondan uschia la proposta dal parlament communal ch'aveva pledà encunter il project.
Il segund credit percunter è vegnì approvà: 75% da las votantas e dals votants èn s'exprimids per ils 9,1 milliuns francs per sanar la chasa da parcar Quadrellas. Las lavurs èn planisadas durant la stad 2023 – la reavertura sin la stagiun d'enviern.
La revisiun parziala da la planisaziun locala «Hotel Laudinella» è vegnida approvada cun 77% da las vuschs valaivlas.
En il parlament communal èn vegnids elegids Gian Andrea Conrad (PPS) e Leandro Testa (PLD). Ils dus sezs èn restads vacants damai che Gian Marco Tomaschett e Christoph Schlatter èn vegnids elegids en suprastanza la fin da settember.
Domat approva via da colliaziun
52% da las votantas e dals votants da Domat han acceptà l'iniziativa che pretenda ina via da colliaziun tranter las vias existentas a l'ur dal vitg (Via Musel e Via Sid).
Er tschellas fatschentas communalas han ils da Domat approvà:
- Credit da 3,7 milliuns francs per far accessibel il santeri a persunas cun impediments e per ina nova chaplutta da morts. Cunquai ch'il santeri da la baselgia Sogn Gion sa chatta sin la Tuma Turera, èsi planisà da construir in ascensur che maina dad ina a l'autra terrassa dal crest. La nova chaplutta da morts è previsa a Crestas, al pe da la tuma.
- Il preventiv da Domat mussa in deficit da bun 350'000 francs, quai tar entradas ed expensas da circa 40 milliuns francs. Il pe da taglia resta sin 85% da la taglia chantunala simpla.
Poschiavo di Na a parcadi
Las votantas ed ils votants da Poschiavo han refusà cun 72% in credit dad 1,6 milliuns francs per in parcadi e la fermada da l'auto da posta en il quartier «Pozzolascio». Il project aveva previs da far pli segir l'entrada da Sfazù viers la Val di Campo – ina vallada turistica sin via dal Bernina vers Poschiavo.
Plinavant han las Puschlavinas ed il Puschlavins elegì Cristina Gerber-Giuliani en la suprastanza communala. Er èn vegnids elegidas 15 persunas en il cussegl communal – in sez en la fracziun da Prada resta vacant. Il «podestà» è gia vegnì elegì il settember: Giovanni Jochum resta president communal.
Via forestala per Mustér
Il suveran da Mustér ha approvà cun 59% il credit da bunamain 5,7 milliuns francs per realisar il project «Avertura Val Segnas ed Uaul Run». En omadus territoris vai per garantir la tgira dal guaud da protecziun, quai enten construir u schlargiar las vias d'access. Il november 2020 aveva il suveran refusà in credit da bunamain 4 milliuns francs.
Zezras elegia Daniel Freund
La vischnanca da Zezras ha elegì en il segund scrutini Freund per il presidi communal. Quai cun 443 da total 995 vuschs valaivlas.
Suprastanza a S-chanf è cumpletta
Cun 89 da total 160 vuschs valaivlas è Paolo Bernasconi vegnì elegì en la suprastanza communala. Quest sez è restà vacant suenter ch'il suveran ha elegì la fin d'october en l'emprim scrutini trais suprastants ed il president Riet Campell. Plinavant substituescha Verena Zwicky la suprastanza communala e Seraina Luzi è elegida en il cussegl da scola.
Center da seniors a Vaz po vegnir planisà
La suprastanza communala da Vaz po planisar ils detagls per in nov center da seniors: Passa 93% da las vuschs valaivlas han ditg Gea a la dumonda da bajegiar in nov center da seniors sper la chasa da tgira actuala che porscha 35 plazs e che na correspunda betg pli als basegns d'ozendi.
Medemamain ha il suveran decis cun ina stgarsa maioritad ch'i duai en quest nov center da seniors er dar spazi per stizuns che porschan en emprima lingia victualias.
La dumonda sche centers da cumpra da passa 700 meters quadrat duain esser pussaivels da realisar en l'avegnir han ils da Vaz refusà cun 54%.
Tujetsch da nov senza parlament communal
Ils da Tujetsch han decis d'abolir il parlament communal e quai cleramain cun 74% da las vuschs. Da nov duai la vischnanca avair ina suprastanza, ina radunanza e decisiuns a l'urna. En ina votaziun consultativa aveva il suveran gia signalisà da vulair ir en questa direcziun. La midada da la constituziun prevesa anc ulteriuras midadas: I na dat nagina limita per il temp d'uffizi pli ed er persunas da l'exteriur duain survegnir il dretg da vuschar e da vegnir elegidas.
Gea a «Scoula Scuol+»
La planisaziun detagliada dal project «Scoula Scuol+» po cumenzar – las votantas ed ils votants da Scuol han approvà cun prest 80% la votaziun consultativa. Cunquai ch'i mancan stanzas da scola a Scuol vul la vischnanca far urden cun las localitads communalas e decider tge diever che fa senn en tge lieu. Per tut las renovaziuns e construcziuns quinta la vischnanca cun custs da 35 milliuns francs.
Pli lung temp d'uffizi a Panaduz
Las votantas ed ils votants da Panaduz han decis da prolungar il temp d'uffizi per ils gremis communals, quai cun 72% da las vuschs. Empè da trais onns duai valair quatter onns ed ina limita maximala da 12 onns. Per il presidi communal duai valair ina limita da 16 onns – senza in eventual temp en suprastanza.
Lumnezia ha nov suprastant – i resta in sez
Gian Caduff succeda a Martin Rupp ch'ha demissiunà aifer la perioda d'uffizi en la suprastanza communala. Sias incumbensas sco schef dal forestalesser ha Renzo Blumenthal surpiglià dapi questa primavaira ad interim. Entant ha dentant er Renzo Blumenthal demissiunà sco suprastant, uschia ch'in sez resta vinavant vacant.
Tavau adattescha las zonas
La vischnanca da Tavau sto adattar sia planisaziun locala a las perscripziuns federalas. Las votantas ed ils votants han approvà tuttas trais fatschentas davart zonas da spazi d'auas e zonas da privel:
- 85% per determinar e fixar las zonas da spazi d’auas
- 84% per adattar las zonas da privel 1 e 2
- 83% per attribuir las surfatschas da terren da construcziun ch’èn pertutgadas da la zona da privel 1 a l’ulteriur territori communal resp. zona agricula
10,5 milliuns francs per nova scolina ad Untervaz
La vischnanca dad Untervaz po stgarpar giu e bajegiar da nov la scolina: Cun prest 52% ha il suveran deliberà in credit da 10,5 milliuns francs. Il bajetg actual datescha da l'onn 1938 e na correspunda betg pli als basegns d'ozendi. Plinavant è previs ina garascha sutterrana cun bunamain 60 parcadis. Ensemen cun la nova scolina duai er il plaz da sport en il liber vegnir modernisà – il credit persuenter munta a bunamain 1,1 milliuns francs.
Favugn reagescha sin dumber d'uffants creschent
Favugn auza il pensum per il mainascola da 90 sin maximalmain 120%. La raschun saja che la scola crescha ad in crescher e dumbra bainbaud passa 400 uffants e bunamain 50 persunas d'instrucziun. Er il pensum dal secretariat duai vegnir auzà da 40 sin 60%. Plinavant adattescha Favugn sia planisaziun locala per pudair runcar tschertas paplas per lung la via da Calinis.
Alvra conferma sia suprastanza
Ils dad Alvra han elegì lur suprastanza communala. Tut las sis persunas en uffizi èn vegnidas reelegidas per in'ulteriura perioda: Rico Liesch, Patrizia Zanini, Ivan Sonder, Reto Crameri, Agnes Simeon e Flavia Balzer. La fin d'october era gia il president Daniel Albertin vegnì reelegì.
Trun dat liber 2,6 milliuns per via pli segira
Trun accepta in credit da 2,6 milliuns per sanar la via Campliun – Caltgadira. La via che maina a la baselgia da Nossadunna duai vegnir pli lada e pli segira.
Schiers er part da «Partenz Marketing»
Il suveran da Schiers ha decis da participar a la nova organisaziun «Partenz Marketing» che duai promover il turissem en il Partenz. Quai cun sustegn da passa dus terszLa contribuziun annuala munta a 38'000 francs.
Naginas rachetas pli a Grüsch
Grüsch restrenscha fieus artifizials e quai sur l'entir onn. Cun reveder la lescha da polizia dovra mintga fieu artifizial ina lubientscha da la vischnanca, da nov er fieus per l'emprim d'avust.
Plinavanti reveda Grüsch cumplettamain sia planisaziun locala. Uschia er per mobilisar reservas da terren da bajegiar, pia da nizzegiar las zonas existentas senza crear nov terren da bajegiar. La revisiun è stada necessaria per l'ina suenter la fusiun da las vischnancas Fanas, Grüsch e Valzeina e per l'autra er per esser conform a las prescripziuns federalas.
Lostallo ha elegì ses municipio
La vischnanca da Lostallo ha elegì Ygor Capelli, Filipe Carneiro, Nicola Giudicetti, Moreno Monticelli ed Andrea Peduzzi en suprastanza communala.
Castaneda ha elegì sia suprastanza
La vischnanca Castaneda en la regiun Moesa ha reelegì Luca Calvia, Michela Marangoni ed Athos Rossini per in'ulteriura perioda d'uffizi en suprastanza communala. Nov commember da la suprastanza è Davide Silvanti.