La riva dal Lai da San Murezzan è in magnet. Ella è spazi da viver, ma era spazi da recreaziun per indigens e giasts. Cun il project «Riva Viva» vuleva la vischnanca meglierar en otg etappas la situaziun sin il traject da 4,4 kilometers enturn il lai, embellir e revitalisar la riva. Il suveran ha però franà quels plans e ditg Na ad ina dumonda da credit da 4,45 milliuns francs cun var 57% da las vuschs. Sco quai ch'il president da San Murezzan Christian Jott Jenny ha ditg sin dumonda da RTR saja l'entir project per il mument giud maisa. La vischnanca sa concentreschia sin auters projects.
Quai vuleva il project
-
Bild 1 von 3. Schlargiar la via a l'ur dal Lai da San Murezzan sin 4,5 meters. Bildquelle: vischnanca San Murezzan.
-
Bild 2 von 3. La riva dueva esser lieu d'inscunter. Bildquelle: vischnanca San Murezzan.
-
Bild 3 von 3. Bildquelle: vischnanca San Murezzan.
Il Na na vegn betg surprendentamain
L'entir project per revitalisar la riva dal lai, dar dapli spazi ad animals, meglierar la situaziun per velocipedistas e viandants cun schlargiar la via e midar trassé da via era dispitaivel. Gia en il parlament hai dà grondas discussiuns cun tractar la fatschenta, fertant che la fracziun da la Next Generation era persuenter, era la Partida populara cunter ils plans. Lezza crititgava fermamain ils custs dal project. Er en brevs da lecturs eri da leger critica envers il project.
L’entir project era planisà en otg etappas cun mintgamai ina votaziun. Uschia ha la populaziun gia fatg in stritg atras il quint a la vischnanca cun l'emprima chaschun.