Sche Vus tschertgais regularmain novitads sur Google avais forsa constatà ch'i ha dà ina midada quai che resguarda la tschertga: La maschina da retschertga ha introducì ina nova funcziun che sa numna «funtaunas preferidas». Cun agid da quella èsi pussaivel da fixar, tge medias ch'ins vul vesair pli savens sch'ins vul purtar sasez sin il current.
Tgi che selecziunescha per exempel RTR u SRF sco «funtaunas preferidas», influenzescha uschia quant'impurtanza che vegn dada als divers cuntegns – uschia èn ins pli pauc dependents da la selecziun da l'algoritem.
Co poss jau fixar RTR sco funtauna preferida tar Google?
Quai è pussaivel cun be dus clics: via il suandant link arrivais directamain tar las preferenzas da funtaunas da Voss account da Google, nua che RTR po vegnir selecziunà sco opziun. Cliccai sin la fanestra e tscherni la chaschetta. E schont è RTR fixà sco Vossa funtauna preferida.
Tge capita sch'jau selecziunesch RTR sco funtauna preferida?
Vossa tschertga sin Google vegn persunalisada tenor las preferenzas che Vus avais inditgà. Uschia vegnan pia mussads pli savens cuntegns dad RTR, tant en la sparta «sensaziuns» (Schlagzeilen) sco era en in'atgna sparta cun il num «da tias funtaunas».
Ves jau lura anc novitads d'autras funtaunas?
Vus pudais selecziunar uschè bleras funtaunas preferidas sco Vus vulais ed adina midar u adattar quellas tut tenor giavisch. Tuttina per tgeninas funtaunas che Vus as decidais: I vegnan era vinavant mussà auters cuntegns ed autras paginas d'internet per che Vus survegnis differentas perspectivas d'in tema.