- La SRG SSR e l'Associaziun svizra dals editurs sa cunvegnan per l'emprima giada sin mesiras communablas per rinforzar las medias svizras.
- Cun las mesiras vulan las medias privatas e las medias finanziadas publicamain rinforzar la confidanza da la populaziun e da la politica e proteger la diversitad da las medias.
- Plinavant duai dar impuls d'investir daners da reclama en medias svizras.
Jau ma legrel fitg, ussa èsi reussì a nus da cuntanscher ina cunvegna che rinforza la plazza da medias Svizra ed uschia la democrazia.
Concentraziun sin l'affar principal
Il punct central da la cunvegna è la purschida online da la SSR. Quella è d'impurtanza existenziala per la SSR, perquai che mo cun quella po la SSR ademplir sia incumbensa da service public er en l' avegnir. Entras la cunvegna na stettia betg pli la preschientscha online sezza en dumonda, mabain mo pli la furma da quella, scriva la SRG SSR.
La SSR vegn a sa concentrar digitalmain anc pli fitg sin sia fatschenta principala, il radio e la televisiun. La SSR renunzia ultra da quai er vinavant da far reclama en la purschida online.
La SSR limitescha contribuziuns da text en il futur sin 2'400 segns, contribuziuns en las novitads ed en il sport èn colliadas cun cuntegns d’audio u video. Formats interactivs restan excepziuns, medemamain renunzia la SSR a livetickers da text en cas d’eveniments da sport transmess exclusivamain. Plinavant vegn la SSR a colliar contribuziuns da medias svizras privatas, nua ch’i fa senn redacziunalmain per rinforzar la l'influenza da las medias privatas.
Sche medias publicas e privatas sa cumpletteschan alura gudogna a la fin la populaziun.
Focus sin la cooperaziun
Tar las transmissiuns da sport vegn la SSR a sa concentrar sin cuntegns che na vegnan betg cuvrids dals purschiders commerzials e resguarda dapli purschiders privats cun tscherner ils dretgs.
La SSR e l'associaziun d'editurs planiseschan d'extender lur collavuraziun: la SSR metta a disposiziun mintga di material betg elavurà, senza logos, e sa participescha ad ina soluziun da branscha da replay-TV. Ultra da quai investescha ella la gronda part da ses daners da marketing online en chasas da medias privatas da la Svizra e metta cun quai in signal impurtant per rinforzar il martgà da reclama svizzer.
Editurs èn cunter l'iniziativa da sbassar la taxa da medias
Sco part da la cunvegna renconuscha l'Associaziun svizra d'editurs la finanziaziun da la SSR entras las taxas e refusa l'iniziativa da «200 francs bastan». L'iniziativa vul retrair al sistem da medias svizzer mintg'onn tschients da milliuns francs.
En in proxim pass vegn il text da la cunvegna preschentà al secretariat da la cumissiun da concurrenza (Weko) per l'examinaziun dal dretg dals cartels. La TX Group na fa betg part da questa cunvegna, sa participescha dentant vinavant a discurs cun la finamira d'in sistem da medias cumplementar tranter purschiders privats e publics.
Maisa radunda communabla
Per sviluppar vinavant las mesiras vegn etablida ina maisa radunda communabla, nua che represchentantas e represchentants da la SSR e da l'associaziun d'editurs sa radunan duas giadas ad onn. En quest connex vegn examinada la realisaziun, i vegnan barattadas experientschas e sviluppadas vinavant las mesiras – cun la finamira da concepir il provediment da medias a la populaziun er en l'avegnir a moda vasta, fidada e multifara.
