Il schaner 2024 ha Gilles Marchand decis ensemen cun il cussegl administrativ da remetter sia funcziun en vista a l'urari da las proximas sfidas politicas e da fatschenta da la SRG la fin dal 2024. Quai cun la finamira ch'ina successiun saja pronta sin il pli tard l'entschatta dal 2025.
Il cussegl d'administraziun ha elavurà in profil da pretensiuns per la funcziun ed instradà immediatamain la tschertga da la successiun dal directur general. La plazza è vegnida scritta ora publicamain. La cumissiun da persunal ha examinà minuziusamain candidaturas internas ed externas cun sustegn da spezialists. Suenter la terminaziun da quest process è il cussegl administrativ vegnì a la conclusiun che Susanne Wille saja la persunalitad la pli adattada per prender per mauns las sfidas da la chasa da medias ils proxims onns.
Sfidas che pretendan diversas cumpetenzas
Cun la transfurmaziun digitala, cun la votaziun dal pievel davart l'iniziativa 200 francs bastan e cun la tractativas davart la nova concessiun da la SSR, spetgan svilups decisivs per la chasa. Susanne Wille è ina persunalitad da direcziun cun experientscha, ina communicatura versada e plurilinga e po cun sias funcziuns multifaras sin ils pli differents champs profitar d'ina rait da contacts vasta e cumprovada. Ella porta medemamain in grond know-how da la transfurmaziun digitala ed ha in'auta cumpetenza da management e da strategia. Cun quai porta ella las abilitads necessarias per manar la SRG SSR cun success en il futur.
Susanne Wille è actualmain manadra da la partiziun «cultura» e vicedirectura da SRF. Ella cumenza sia funcziun il prim da november 2024.
Reacziuns positivas ed era pretensiuns
L'allianza Pro diversitad mediala sa legra da l'elecziun da Susanne Wille sco directura generala da la SRG SSR. Ella haja persvadì enfin ussa en tut sias funcziuns sco schurnalista, moderatura e managera da medias. Consequentamain saja Wille ina persunalitad vardaivla en quest post.
Er il cussegl dal public SRG Svizra tudestga è persvadì che Wille saja dretga persuna en quest lieu.
Il sindicat svizzer dals meds da massa SSM spera sin in partenadi social pli ferm. Wille stoppia esser conscienta che collavuraturas e collavuraturs sajan la pli impurtanta resursa da la SRG SSR – pia saja dad esser precaut sch'i giaja per mesiras da persunal.