Fitg intensiv saja l'onn stà surtut pervi da la situaziun a Brinzauls, di Daniel Albertin, president communal d’Albula/Alvra. Pervi da la costa instabila sur il vitg è Brinzauls dapi ils 17 da november 2024 evacuà.
Dapi questa segunda evacuaziun è il vitget muntagnard bandunà, e dapi lura avain nus accumpagnà Daniel Albertin cun la camera.
Nadal en l'exil – l'emprima filmada
L’emprima filmada per il film «Responsabladad al limit – in onn cun Daniel Albertin» ha gì lieu durant la messa da Nadal avant in onn ad Alvagni. Igl è l’emprim Nadal che quellas e quels da Brinzauls na pon betg passentar en lur dachasa. Ina situaziun trista e perquai è vegnì l’uvestg da Cuira a consolar.
Tals muments dattan da pensar a Daniel Albertin. Èsi stà la dretga decisiun, u avessan ins pudì evitar in’evacuaziun? Dumondas ch’èn vegnidas tar Daniel Albertin durant la messa da Nadal. A la fin è el conresponsabel che quellas e quels da Brinzauls na pon betg festivar Nadal a chasa.
Sesidas e rapports d'in cuntin
Durant l'entir onn è la costa baud dapli e baud pli pauc en moviment. Cler, cura ch’il moviment è pli grond, è Daniel Albertin pli dumandà. Però independent da l’activitad sin la costa ha lieu ina sesida ed in rapport suenter l’auter. Cura pon las puras ed ils purs ir en la zona serrada a cultivar lur funs? Dovra quai ina fasa blaua, perquai ch'il moviment sin la muntogna crescha? U co communitgar il proxim pass per in’eventuala dischlocaziun? Questas dumondas emprova Daniel Albertin da respunder ensemen cun ils geologs, represchentants dal chantun e da la vischnanca durant questas sesidas e rapports.
Ussa discutain nus dapi 2½ uras sur d’in ’eventuala fasa blaua – e quai malgrà che la probabilitad ch'insatge capita è minima… Igl e schont ina situaziun dal diavel.
Esser da different’opiniun saja gist. Quai dovria era en ina tala situaziun, di Daniel Albertin. Ma sch'el legia en gasetta critica che n'è tenor el betg giustifitgada, lura saja quai difficultus. En tals muments è el persvas ch'i dess schont chaussas pli simplas che dad esser president communal. Tuttina vul Daniel Albertin restar president fin a la fin da la legislatura che chala la fin dal 2026.
Tut tenor la situaziun a Brinzauls lavura Daniel Albertin en in pensum da 50% fin 80% per la vischnanca. Dasperas maina el ensemen cun sia dunna e l’agid dad in emprendist in bain puril a Mon, nua che els èn dachasa. Dapi ch’el ha surpiglià il bain da ses geniturs maina el quel tenor l’allevamaint da vatgas mamma – ina puraria cun var 70 arments.
- pur, 54 onns
- president communal Albula/Alvra
- maridà cun Tanja
- bab da duas figlias creschidas
La famiglia e l'esser pur dattan forza
Las lavurs da pur sajan in bun equiliber a la lavur sco president communal. Durant il puresser sco era en discurs cun sia famiglia po Daniel Albertin reflectar tschertas decisiuns fitg bain. Ultra da quai po el uschia era chargiar sias battarias e vegnir a novas forzas per las proximas sfidas.