Manuela Gebert, ch’è advocata, viva dapi l’onn 2019 ad Alvagni Bogn e sa sentia fitg bainvegnida en il vitg ed en la val, ha ella tradì envers RTR. Sia motivaziun per la candidatura saja il giavisch da s’engaschar e da betg spetgar ch’insatgi auter surpiglia las incumbensas. Malgrà ch’ella n’ha nagina experientscha politica directa, ha ella – grazia a sia activitad professiunala sco advocata – blera experientscha cun la politica e cun temas politics.
Gebert che descriva sa sezza sco persuna mirvegliusa ed allegraivla, è independenta da partidas ed ha ina experientscha professiunala vasta, tranter auter sco derschadra accessorica e sco cussegliera administrativa. Ella cusseglia vischnancas en temas da construcziun, da planisaziun e da submissiun ed integrescha gugent questas experientschas en il presidi communal. La candidata accentuescha ch’ella na surpiglia betg da levsenn l’uffizi, mabain ch’ella saja s’occupada intensivamain da las consequenzas. Malgrà ch’ella n’ha nagina experientscha en in presidi communala è ella persvadida ch’ella è la dretga persuna per quest uffizi.
Svilup demografic fa quitads
Ina da las sfidas las pli grondas per la vischnanca Albula/Alvra vesa Gebert en connex cun il svilup demografic e cun la motivaziun da la glieud giuvna da restar en la regiun e da s’engaschar. Durant ils emprims mais suenter in’elecziun eventuala vuless ella – l’emprim rimnar infurmaziuns, leger e discurrer cun l’administraziun per fixar las prioritads. Il barat cun la populaziun vul ella tgirar activamain cun visitar ils differents lieus da la vischnanca e discurrer cun la glieud al lieu. Manuela Gebert viva dapi intgins onns ad Alvagni e sa senta fitg integrada e recepida bainvulentamain en la vischnanca. La bilinguitad da la vischnanca è impurtanta per ella ed ella è gia vi d’emprender rumantsch surmiran.
Sia chanzlia d'advocatura a Berna ch’ella maina dapi l’onn 2019, mettess ella sin «flomma da spargn», per pudair dumagnar l’uffizi dal presidi communal. Manuela Gebert è l’unica candidata per il presidi. L’elecziun è ils 14 da zercladur a l’urna.
Atgnamain vuleva Daniel Albertin gia dar giu ses uffizi cun la fin 2024. Cunquai ch'i n'è lura però betg gartegià da chattar ina successiun, ha el decis il november da tuttina anc restar president communal fin ch'insatgi è pront da surpigliar l'uffizi.
L'atun vegn cumplettada la suprastanza
Da la suprastanza communala actuala han inoltrà la demissiun Agnes Simeon e Martin Christen. Patrizia Zanini ha gia decidì ch’ella veglia candidar per in’ulteriura perioda d’uffizi.
Ils auters en suprastanza n'han betg anc decidì. Sco nov candidat per la suprastanza sa metta a disposiziun Roman Brenn, ch’è stà il davos president communal da Stierva avant la fusiun. In auter candidat per in post en suprastanza è René Tiefenthal, il president actual da la cumissiun da gestiun da la vischnanca Alvra. L'elecziun da la suprastanza communala è quest atun.