Dapli che indesch onns suenter la fusiun suttametta la vischnanca Albula/Alvra sia constituziun communala per l’emprima giada ad ina revisiun cumplessiva. L’experientscha dals ultims onns haja mussà ch’intginas reglas na correspundian betg pli cumplettamain a la pratica actuala, è da leger en il messadi da la vischnanca. En spezial la gronda chargia da lavur da la suprastanza communala e dal presidi communal – tranter auter en connex cun la bova da Brinzauls – hajan mussà quant impurtantas che reglas cleras e realisticas per las elecziuns da las autoritads sajan.
In intent central: adattar ils termins da las elecziuns
En l’avegnir duai il presidi communal vegnir elegì gia en l’emprim semester. Uschia restia dapli temp per tschertgar candidatas e candidats ed era per garantir ina surdada ordinada. Gist en vista a las proximas elecziuns saja quai in punct impurtant. Actualmain na datti anc naginas candidaturas uffizialas per il presidi, dentant pondereschan diversas persunas ina eventuala candidatura, ha RTR chattà ora en divers discurs e dumondas per email.
Surlavurar la linguistica e crear cussegl da scola
Ultra da quai vegn la Constituziun adattada al dretg chantunal actual ed elavurada linguisticamain e structuralmain. Ella duai restar concisa e sa concentrar sin l’essenzial. Ulteriuras novaziuns impurtantas èn l’introducziun d’in cussegl da scola cun tschintg commembers che vegn elegì a l’urna. Però datti er reglas pli cleras davart sesidas, proceduras da decisiun e cumpetenzas da las autoritads.
Cun questa revisiun vul la suprastanza communala render l’organisaziun communala pli effizienta, pli moderna e pli attractiva per persunas che s’interesseschan per incaricas politicas.