Sco è la situaziun actualmain a Brinzauls?
Daniel Albertin: La situaziun è in zichel sa meglierada, pia è sa quietada in zic. Natiralmain anc adina sin in nivel aut uschia che nus na pudain betg anc avrir la vischnanca – quai è anc in zic difficil. A partir da quest'emna pon ils purs puspè ir en a far fain e pon duvrar las stallas.
Ins sto tuttina dumandar sasez sche la situaziun è propi meglra – perquai che nus avain atgnamain spetgà ch'i vegnia ussa lura giu insatge e che nus sappian pli precis tge che capita. Ussa essan nus puspè en la fasa che nus stuain spetgar avant che nus sappian prender mesiras che cuntentan la populaziun.
Tge fa quest vi e nà persunalmain cun Vus ?
Quai fa schon vegnir in zic ... stuf ... dentant datti da pensar ch'ins sto adina puspè empruvar da communitgar autras chaussas. I n'èn betg novas chaussas, ma era betg las chaussas che nus communitgassan gugent. Quai è per part schon stentus en in uschè lung temp. Nus na discurrin betg dad emnas, mabain da nov mais che nus essan evacuads. Ed en quest temp avain nus spetgà che insatge vegnia giu u che nus hajan avunda infurmaziuns per che la glieud possia ir enavos.
Co va il stab da crisa e la vischnanca enturn cun questa situaziun?
Entant han ins era emprendì dad ir enturn cun questa situaziun ch'è intscherta. Da l'autra vart pensan ins natiralmain schon era sche quest piz vegniss ussa ina giada giu, lura savessan ins simplamain prender ina decisiun finala – quai fiss schon in levgiament per il stab da crisa e per ils pertutgads. Atgnamain fiss quai per tuts pli simpel.
Tge èn las dumondas che Vus survegnis?
Quai èn tut differentas. I na dat betg in di nua che nus n'avain betg da dar ina resposta en ina moda e maniera che pertutga Brinzauls. Saja quai per la dischlocaziun, per l'uffizi da guaud u dals pertutgads. Brinzauls è mintga di tema sin il telefonin u en ils e-mails.
Tge pensais Vus persunalmain quant ditg che Vus faschais anc questa lavur sco president communal?
Jau emprov simplamain da far mia lavur anc conscienziusamain quest in onn e mez. E suenter ha la vischnanca schon da guardar per mia successiun. Jau sun lura stà per 12 onns president communal d'Albula/Alvra ed otg da quests onns avain nus gì la sfida cun Brinzauls. Ed jau crai ch'ins haja lura empruvà da far il ses pussaivel, dentant ins n'è betg president communal per adina. I vegn franc a dar schliaziuns, ma ins sto ir a tschertgar ellas.