La situaziun sut il vitg da Brinzauls è sa calmada. Cunquai ch’il terren enturn il vitg è sientà in pau, na saja betg pli da temair che material da la bova vegnia giu fin las colliaziuns da traffic sco la lingia da la Viafier Retica. Quai communitgescha la vischnanca Albula/Alvra en ses nov bulletin. Perquai aboleschan ils responsabels davent da dumengia da mezdi ina part da las mesiras da segirezza per la regiun sut il vitg.
Persunas che van cun velo u a pe pon puspè duvrar la via chantunala da Casti vers Vazarouls, e la via chantunala e la senda da viandar da Casti a Surava. Ed il sport da canu ed il pestgar en l’Alvra èn puspè lubids sin quest traject, sco la vischnanca scriva. Vitiers vegn il sistem d’amplas supplementar sin las duas vias chantunalas e per la Viafier Retica deactivà.
Vias e lingias èn stadas serradas curt
Il venderdi saira e la notg sin la sonda ha il sistem da radar che dirigia las amplas registrà duas crudadas da crappa. Sinaquai ha quel serrà automaticamain las vias ed il traject da la viafier. Il sistem ha lura examinà, sche material da la «Schutthalde oben» vegnia spert a val e pudess esser in privel per las colliaziuns da traffic. Damai che quai na saja betg stà il cas haja il sistem suenter paucas minutas puspè da liber las vias ed ils binaris.
Sco la vischnanca d’Alvra accentuescha en ses nov bulletin, vala dentant vinavant la fasa cotschna per il vitg. I resta scumandà d’entrar en il vitg da Brinzauls ed en il territori enturn quel. Sche la situaziun da privel sa meglierescha vegnian questas mesiras adattadas, scriva la vischnanca.
La «Schutthalde oben» ha fatg quitads
A Brinzauls saja la fin d'emna passada crudada dapli crappa che supponì. Quai ha la vischnanca d'Alvra gì annunzià ils 28 da fanadur en ses bulletin. Uschia sajan pervia da la blera plievgia crudà 25'000 meters cubics crappa sin l'uschenumnada «Schutthalde oben» che sa mova ussa perquai marcantamain pli sperta – il tempo saja actualmain 35 cm a di, ha la vischnanca scrit en ses bulletin. Quai saja sis giadas uschè spert sco l'entschatta fanadur.
L'emprim èn las autoritads idas da quai anora, ch'i sajan crudads enturn 10'000 meters cubic crappa. Cun maletgs da dronas hajan ins ussa pudì precisar questa cifra. Tenor prognosas, vegnia la plievgia en il proxim temp a chaschunar dapli crudadas da crappa ed in augment dal moviment. La situaziun restia perquai vinavant critica.
Suenter in pau plievgia il 1. d'avust vegnia l'aura puspè pli sitga. Pir lura possian ins puspè dar access al vitg ed a las surfatschas agriculas en la zona da deflussiun.
Per il vitg da Brinzauls na dettia dentant nagin privel direct. Tenor il pledader da la vischnanca, Christian Gartmann, na sajan quellas bovas atgnamain nagut nunusità.
Tuttina sa preparian las autoritads sco prevenziun per ina fasa blaua pussaivla. Uschia sajan per exempel amplas supplementaras vegnidas installadas en cas ch'i fiss da serrar las vias chantunalas u binaris da tren. Uschespert ch'il privel da crappa saja schlià vegnan ils binaris sco las vias puspè dadas libras.
Plinavant preparian ins in scumond per velos e peduns sin las duas vias chantunalas. Era las sendas da viandar tranter Casti e Surava vegnissan serradas durant ina fasa blaua – medemamain na fissan lura la pestga ed il sport da canu betg pussaivel en la zona da privel.
Las preparaziuns per la fasa blaua è ina mesira da precauziun. Nus na savain betg excluder dal tuttafatg ch'i pudess dar crudadas da crappa pli grondas che vegnan lunsch engiu, perquai ch'igl è per il mument fitg bletsch.
Ils experts quintan che la situaziun vegnia bainbaud puspè a sa calmar, ma persequiteschan vinavant il svilup. Er il geolog e manader dal sistem da preavertiment ha declarà envers SRF che las preparaziuns per ina pussaivla fasa blaua saja ina mesira da precauziun. Pervia da la plievgia permanenta da l'ultim temp haja puspè dà dapli crudadas da crappa pitschnas ch'han auzà marcant il tempo da la grava sur Brinzauls.
Cunquai che l'entir terren en il territori saja actualmain fitg bletsch pudessia la grava en cas d'in sbuvaditsch pli grond era vegnir engiu fitg lunsch – en il mender cas fin a la via chantunala u als binaris da la Viafier retica, declera il geolog Stefan Schneider. Schegea ch'ins na quintia betg cun in eveniment pli grond na possian ins betg excluder in tal dal tuttafatg e perquai sajan las preparaziuns per ina fasa blaua necessarias per esser pront per mintga situaziun. Parallel persequiteschian ins la situaziun intensivamain.
Interpresas localas persequiteschan la situaziun
Era las interpresas localas fan patratgs davart ina pussaivla fasa blaua. Tar l'orticultura Schutz da Filisur fissan 8 dals 40 emploiads pertutgads – sche la via e viafier fiss bloccada. Ins pudessi organisar a curta vista chombras en in hotel u tar privats, di il schef Wolfgang Schutz.
Per l'Argo ch'ha ina chasa da dimora a Surava muntass ina via bloccada da la via ch'ils abitants da la chasa na pudessan betg ir a la lavur a Casti, en il lavuratori, e per il persunal muntassi in viadi pli lung. Plans concrets n'hajan ins dentant anc betg, di Andreas Kuoni, il manader da la chasa a Surava.
Era per l'industria da laina è la via tras la val impurtanta. Tant la gruppa Uffer, sco era l'interpresa Florinet a Bravuogn avessan da s'adattar e survegnissan problems sch'ina interrupziun cuzzass pli dietg che duas fin trais emnas.