A Brinzauls frunta l'offerta da bandunar preventivamain il vitg periclità sin marcantamain dapli interess che quai che la vischnanca d'Alvra ha quintà. Marcantamain dapli possessuras e possessurs da chasas che pensà hajan acceptà l'offerta correspundenta, conferma il pledader dal stab da medias Christian Gartmann envers SRF.
Fin la fin da settember hajan ins survegnì 40 annunzias per ina translocaziun da 45 bajetgs. La populaziun permanenta da Brinzauls vegn a sa reducir per dapli che dus terzs tras translocaziuns. La maioritad pertutga abitaziuns secundaras u da vacanzas. Per il futur da la vischnanca fetschia era Daniel Albertin quitads, hai num en la communicaziun da medias.
Il vitg sa midass fermamain sche talmain blera glieud giess davent.
Surpigliada da custs e dumber d'abitants
La vischnanca stima però ch'er bun 35 abitantas ed abitants vegnian a dar si lur chasas. Ils custs per l'offerta da bandunar preventivamain il vitg vegnan surpigliads per 90% dal chantun e da la Confederaziun. Dapi l'evacuaziun il november eran bun 30 abitantas ed abitants partids definitivamain u morts. Avant l'evacuaziun dumbrava Brinzauls anc 90 abitantas ed abitants.
La radunanza communala Albula/Alvra ha concedì fin avust cumpetenzas a la vischnanca en connex cun finanziaziuns transitoricas per persunas che vulan bandunar Brinzauls per adina ed ir ad abitar insanua auter. Concret vai totalmain per in credit da fin a 20 milliuns francs. Avant pudeva la suprastanza decider en atgna cumpetenza davart credits be fin ina summa da 100'000 francs. Summas pli autas eran suttamessas al suveran.
Igl è bain reglà che Confederaziun, chantun e segiradas pajan la gronda part dals custs da translocaziun, vul dir era quels per nova proprietad. Ma quels daners vegnan tenor las leschas vertentas pir pajads cura ch'il singul project da translocaziun è lubì e l'immobiglia a Brinzauls sbuvada. Per pudair cumenzar cun la nova existenza ston las persunas però avair garanzias vers las bancas. Ed exact per questa fasa fissan quels daners dal credit transitoric.
Ditg curt e simpel vai per la dumonda sche la vischnanca po surpigliar ina sort rolla da «banca transitorica» en il process da translocaziun. Ils detagls tranter l'administraziun chantunala da finanzas e la vischnanca davart las garanzias ed il credit general da 20 milliuns francs sajan anc definir. Ma la suprastanza propona tranter auter da conceder ils credits senza tschains per betg engrevgiar la situaziun.
Quai succeda cun ils edifizis bandunads
Tenor la lescha federala da guaud vertenta stoppian edifizis bandunads vegnir sbuvads, ha declerà Urban Maissen da l'Uffizi da guaud e privels da la natira. I dettia però ina largia en la lescha: Brinzauls haja in maletg da vischnanca da muntada regiunala. Uschia valessan aspects da la protecziun da monuments – vegn citada la gruppa responsabla per la translocaziun.
Mantegnair in vitg «degn da viver»
La vischnanca vul empruvar da mantegnair in vitg «degn da viver» per la populaziun da Brinzauls restanta. Sco Daniel Albertin di en ina communicaziun a las medias poi anc ir in mument fin ch'ins sa co Brinzauls pudess vesair or en l'avegnir.
La decisiun co Brinzauls pudess vesair ora en l'avegnir po crudar il pli baud la primavaira che vegn.
Ils 20 da november aveva la vischnanca preschentà ils plans nua che la populaziun pudess sa chasar en cas d'ina dischlocaziun.
Casti, Alvagni e Vazarouls Vest
L'emprima giada insumma ha la vischnanca preschentà il november infurmaziuns davart ina pussaivla dischlocaziun dal vitg da Brinzauls. Vul dir la vischnanca ha preschentà en ina saira d'infurmaziun publica – nua che abitantas ed abitants pudessan sa chasar en cas che Brinzauls n'è insumma betg pli abitabel pervia dal privel da bovas e crudada da crappa. Per pudair far quai prevesa la vischnanca d'Albula/Alvra da reveder parzialmain la planisaziun locala.
Il pli impurtant – curt e concis:
- La vischnanca d'Albula/Alvra ha preschentà ils plans per ina eventuala dischlocaziun da las abitantas e dals abitants da Brinzauls ch'èn vegnids evacuads pervia dal privel da sbuvadas.
- A Casti ed ad Alvagni prevesa il project novas zonas da construcziun, en las qualas pon vegnir collocadas totalmain circa 170 persunas.
- In ulteriur territori a Vazarouls Vest è en planisaziun cun la finamira da preschentar il project l'onn 2025.
- Update 17-01-2025: Chantun e Confederaziun surpiglian 90% dals custs per cumprar ed urbarisar nov terren da bajegiar. Per Vazerouls Vest han els limità ils custs sin 320 francs per meter quadrat.
Terren per 70 persunas ad Alvagni e per 100 a Casti
Ad Alvagni Vitg prevesa il project da midar radund 3'100 meters quadrats terren en zona da construcziun, quai en il conturn da la chasa da tgira. Qua pudessan vegnir construidas:
- fin a trais chasas da pliras famiglias
- sis chasas dublas dad ina famiglia
- che porschan en tut plaz per radund 70 persunas
A Casti prevesa il project dad enzonar da nov bun 9'500 meters quadrats damanaivel da la chasa da scola Cumpogna. Quai dess spazi per:
- quatter chasas da pliras famiglias
- dudesch chasas dublas
- che porschan plaz per radund 100 persunas
Il terren duai vegnir classifitgà sco zona speziala, exclusivamain per dischlocar Brinzauls. La vischnanca d'Albula/Alvra prevesa da segirar il terren cun dretgs da cumpra. Per Casti Cumpogna hajan ins gia fatg pre-contracts, ha ditg il manader general da project, Silvio Sauter. Ad Alvagni Faderna na sajan ins anc betg uschè lunsch.
Ulteriura zona a Vazarouls Vest
In'ulteriura zona pli gronda a Vazarouls Vest è anc en planisaziun. Vazarouls Vest era tenor ina retschertga da la vischnanca in lieu d'abitadi preferì dals pertutgads e da las pertutgadas en il cas da stuair bandunar Brinzauls. Quest lieu n'ha però anc betg pudì vegnir planisà en detagl perquai ch'el tutgava fin il settember da quest onn anc cumplettamain tar la zona periclitada entras la bova. Uss ha la gronda part da quest terren però pudì vegnir dà liber, uschia ch'era questa planisaziun cuntinuescha. Sco la vischnanca scriva, vegnia a dar in'ulteriura retschertga e la finamira saja da pudair preschentar il plan per enzonar terren a Vazarouls Vest anc il 2025 a la radunanza communala.
Update 17-01-2025
La vischnanca d'Alvra ha entant definì las parzellas a Vazerouls Vest che duaian star a disposiziun per ina eventuala dischlocaziun da Brinzauls. Quai fissen radund 35'000 meters quadrats sur e sut la via chantunala. Actualmain sa tracti da terren agricul, che pudess vegnir midà excepziunalmain a terren da bajegiar per ils abitants e las abitantas da Brinzauls. Uschia ha la vischnancà infurmà ils 8 da schaner possessurs da terren e persunas ch'avessan il dretg d'aquistar. La vischnanca haja tramess offertas a possessuras e persunas autorisadas da cumprar terren. Sco il president da la vischnanca Daniel Albertin ha ditg als preschents, saja questa dischlocaziun be pussaivla, «sche tuts tiran vi da la medema suga.»
Preferientscha per abitantas ed abitants permanents
Las novas zonas stattan a disposiziun tant als indigens ed a las indigenas sco er a possessurs e possesuras da segundas abitaziuns. La preferientscha han però ils abitants e las abitantas permanentas perquai ch'els ed ellas duvrassan in nov domicil. Quai ha punctuà il president da la cumissiun translocaziun, Benno Burtscher a la saira d'infurmaziun. Il manader da l'Uffizi per il svilup dal territori, Richard Atzmüller, ha menziunà ch'ina abitaziun salvia er tar ina dischlocaziun il status quo. Pia ina prima abitaziun restass ina tala ed il medem vala er per ina segunda abitaziun.
Resguardar ils giavischs
Per surdar il spazi d'abitar nov, vegnia fatg in reglament che defineschia tgi che possia survegnir terren sco emprim. En in emprim pass datti tenor il manader general dal project, Silvio Sauter, ina enquista per eruir tgi che haja tge giavischs. Ils possessurs da segundas abitaziuns vegnian dumandads il favrer. Tut en tut dettia actualmain set hectaras terren per abitar a Brinzauls. Il spazi nov ch'ins haja uss en mira, saja actualmain quatter hectaras.
Tge capita cun chasas e terren?
Anc datti bleras dumondas avertas pertutgant indemnisar l'existenza da las abitantas e dals abitants sco er da las duas famiglias da purs che han manaschis e terren a Brinzauls. Ils experts emprovan dentant da dar respostas sin talas dumondas.
Enfin uss è cler tge che vala sch'i va per indemnisar ina chasa. Tenor l'Assicuranza d'edifizis dal Grischun vala tar l'indemnisaziun d'ina chasa che n'è betg pli abitabla il medem sco sch'ina chasa vegniss destruida cumplainamain, per exempel d'ina bova. En in tal cas vegn pajada la chasa en sia valur nova, pia i dat quella summa daners ch'i dovra per bajegiar quella chasa ozendi en in nov lieu.
L'indemnisaziun dal terren n'è betg cumpigliada tar l'assicuranza d'edifizis. Tenor la vischnanca dettia però la pussaivladad ch'il chantun e la Confederaziun surpiglian custs, tant da la midada sco tala ma er da la cumpra e da far accessibel cun vias, lingias, canalisaziun ed auter. Las schliaziuns da finanziaziun correspundentas na sajan però anc betg finidas. Tranter auter saja anc da definir tge cumpart ch'il chantun e la Confederaziun vegnissan a surpigliar. Da vart da la Confederaziun ha la vischnanca però gia survgnì l'infurmaziun ch'i dettia segiramain sustegn finazial en il cas ch'i fiss necessari da translocar il vitg.
Dumondas, vuschs e reacziuns da la populaziun – da critica fin sustegn
Ina dumonda critica hai dà en connex cun ils lieus planisads: Al cumenzament sajan anc stads en discussiun otg differents lieus per novas zonas d'abitar, ussa sajan quai anc trais. Casti Cumpogna na saja betg propi in lieu giavischà per per abitar. Plinavant dettia la tema ch'i na saja uschia betg pussaivel da construir chasas e la populaziun stoppia ir en grondas chasas ed abitaziuns ad abitar.
Il president communal, Daniel Albertin, ha sin quai concedì che Casti Cumpogna na saja tut tenor betg uschè attractiv, ma ins haja stuì sa concentrar sin lieus pussaivels. Ins haja bain discurrì cun possessurs da terren ma or da vista da la planisaziun da l territori na saja betg stà pussaivel da resguardar auters lieus.
Critica hai er dà per l'offerta da 26 francs il meter quadrat per il terren per las novas zonas d'abitar. Benno Burtscher, il president da la cumissiun translocaziun ha respundì che tuttas e tuts vegnian tractads tuttina ed ils possessurs a Casti sajan stads d'accord cun l'offerta fatga. I saja impurtant che la publicitad na stoppia betg pajar in pretsch memia aut per terren che stoppia vegnir mess a disposiziun
Plinavant hai dà la pretensiun che tut giaja memia ditg, i saja da sutminar leschas e far vinavant e cumenzar a bajegiar, uschiglio n'existia Brinzauls betg pli en trais onns. Quai ha dà applaus. La resposta da Daniel Albertin ha però er survegnì applaus: I saja stà grev dad ordinar la segunda evacuziun. Ina terza giada na vegnia el betg a cumandar ina tala. Sche la populaziun dia che la situaziun actuala na saja betg pli supportabla, alura emprovia la vischnanca da chattar in lieu che na saja betg «contaminà».
Er ha ina dunna punctuà che nagin na stoppia sa turpegiar dad ir sin vischnanca e dumandar per agid. Betg tuts sajan situads finanzialmain tuttina bain.
Vitg bandunà pervia da la spunda incalculabla
Dapi ils 17 da november 2024 è il vitg da Brinzauls vid e bandunà. Las autoritads avevan ordinà in'evacuaziun l'emna passada, la spunda sur il vitg ch'è en moviment pudess vegnir cun grond tempo e periclitar il vitg. Gia per la segunda giada han las abitantas ed ils abitants da Brinzauls stuì bandunar lur chasas. L'onn passà era ina bova lura vegnida a val mez zercladur e sa franada gist avant il vitg. Il fanadur 2023 era la populaziun puspè turnada ed aveva sperà da betg pli stuair bandunar Brinzauls.