La situaziun vi dal grip sur Brinzauls è sa calmada dapi la stad, declera il geolog Reto Thöny e manader dal sarvetsch da preavertiment. Anc il fanadur era la situaziun fitg critica: Suenter ch'i aveva pluvì fitg ferm èn pliras bovas da glera vegnidas surengiu. Las bovas sajan bain stadas grondas, dentant betg uschè voluminusas ch'i han pudì – en consequenza – far ir la gronda grava. Lezza saja ruschnada, dentant betg crudada en la vallada.
La ruschnada da la grava è sa calmada tras quellas bovas da glera.
Grazia a quest incident ha tscherta pressiun – ch’era en la muntogna – pudì mitschar e quai ha schluccà cleramain la situaziun.
Il mument na datti nagin privel che la bova vegniss.
La notg n'èsi betg pussaivel d’entrar il vitg
Per la populaziun munta quai ch'ella dastga turnar durant il di en il vitg. La notg vala dentant vinavant precauziun: en in cas serius stuessan las abitantas ed ils abitants vegnir evacuads entaifer 20 fin 30 minutas – els vegnissan alarmads via SMS. Durant la notg stuessan lura gidanters e gidantras entrar il vitg – pia entrar la zona malsegira – per uschia evacuar las persunas che n'han betg vis il SMS.