En bunamain tut las scolas popularas dal chantun Grischun datti direcziuns da scola. Chattar manaders u manadras da scola na saja dantant betg uschè simpel, era sch'i na dettia nagina mancanza, declera la manadra da l'uffizi per la scola populara Chantal Marti-Müller. Per gidar duain manaders e manadras perquai vegnir sustegnidas cun in nov program gia davent dal cumenzament.
Nov program da sustegn
Il sustegn sistematic duai succeder durant lur fasa d'introducziun. Quella introducziun è concepida uschia, che las novas direcziuns duain sa chattar svelt da chasa en lur funcziun e pudair manar professiunalmain. Uschia duain ils e las mainascolas vegnir preparads effizientamain e datiers a la practica. La purschida sa drizza a novs e novas mainascola ed a persunas che cumenzan puspè lur lavur suenter in'absenza professiunala d'almain tschintg onns.
Curt suenter il cumenzament dal nov onn da scola survegnan las participantas ed ils participants ina survista cumpacta davart la scola populara grischuna e davart las basas legalas. Els emprendian d'enconuscher ils responsabels e las persunas da contact tar l'Uffizi per la scola populara ed il sport. L'introducziun cumpiglia duas occurrenzas obligatoricas che cuzzan in di e mez.
Or da l'archiv:
Il team dals «Cuntrasts» ha visità avant paucs onns manadras e manaders da scolas en differentas regiuns dal chantun per vegnir a savair co ch’i va per il mument cun lur incumbensa e cun tge sentiments ch’els guardan en il futur. En fitg bleras scolas èsi ina sfida d’occupar plazzas libras cun persunas d’instrucziun che han la scolaziun pedagogica necessaria. E questa situaziun daventa onn per onn pli acuta.