Pugn da vista - In cumbat electoral plitost lungurus che na tschiffa betg

Cumbat electoral – l'impressiun generala

Cuntrari al 2019 na datti quest onn betg in tema che dominescha la debatta publica en Svizra. Avant quatter onns han l’unda violetta e la midada dal clima procurà per ina midada en il parlament. Quest onn sa focusseschan las partidas sin lur agens temas – quai er en consequenza da las crisas actualas, sco per exempel la guerra en l'Ucraina, la mancanza d'energia u era la migraziun. Quai gida en emprima lingia las partidas dal pol che vegnan probablamain a mantegnair u schizunt gudagnar sezs en il parlament.

Er en il Grischun è il cumbat plitost tievi. In motiv pudess esser ils timuns da las partidas chantunalas che sa tegnan plitost enavos en il cumbat e na provocheschan betg la discussiun.

Il cumbat per il center burgais

Interessanta è la cursa en il center burgais. Per l’Allianza dal Center (AdC) èn las elecziuns dal Cussegl naziunal ina premiera. Cun s’orientar e sa posiziunar da nov ha l'AdC ils davos onns fatg ils dretgs pass strategics. Percunter ha la Partida liberaldemocratica (PLD) manchentà da sa posiziunar e da sa differenziar da las ulteriuras partidas – a dretga e sanestra. Il profil manca. Questa problematica sa mussa er en il Grischun. Ultra da quai sa tschenta en il Grischun anc tut in'autra dumonda tar la PLD: Tant vers l'intern sco vers l'extern n'è la partida betg perina, tgi ch'ella vul propi trametter a Berna.

Tgi va per il tschintgavel sez?

Martin Candinas, Magdalena Martullo-Blocher e Jon Pult èn las trais valurs segiras per lur partidas. Quest trio metta dentant er en la sumbriva la segunda retscha. Tant l'AdC, la Partida populara svizra (PPS) sco era la Partida socialdemocratica (PS) manchentan da posiziunar ina segunda persuna che pudess alura gudagnar in segund sez per la partida. Las partidas paran da surlaschar quest tschintgavel sez a la casualitad.

Facit

Cun la Svizra vai bain. Forsa schizunt memia bain. Perquai vegni strusch a dar grondas midadas ils 22 d'october, sche lura plitost ina correctura enavos. Igl è da sperar che questa correctura procuria era per ina elecziun dal Cussegl federal senza sensaziuns, squitsch e stress per che la politica possia sa concentrar sin schliaziuns per ils gronds problems.

Flavio Bundi

schefredactur RTR

Avrir la boxa da profil Serrar la boxa da profil

Flavio Bundi è dapi il 2017 schefredactur da Radiotelevisiun Svizra Rumantscha (RTR).

Contact

Valentin Schmed

Manader programmaziun RTR

Avrir la boxa da profil Serrar la boxa da profil

Valentin Schmed è vice-schefredactur da RTR e persequitescha dapi onns l'actualitad regiunala, chantunala e naziunala. Sco manader programmaziun è el responsabel per metter accents a media vista en il program da radio, televisiun ed online tar RTR.

Tge è Vossa opiniun? Nus ans legrain sin il barat: 

flavio.bundi@rtr.ch