Questa giada serra il quint annual dal chantun propi cun in deficit, quel importa 218,5 milliuns francs. In dals motivs principals per il deficit è ina contribuziun en la finanziaziun speziala per la protecziun dal clima e l'innovaziun. En il medem mument creschan las investiziuns nettas sin passa 300 milliuns francs. Sco ch'il chantun communitgescha na pon las entradas betg pli tegnair ballantscha a las expensas.
Reducziun strategica da l'agen chapital
Cun l'investiziun da 200 milliuns francs en la finanziaziun speziala per la protecziun dal clima ed innovaziun sbassa il chantun l'agen chapital. Questa mesira reducescha l'agen chapital disponibel e quai sin 666,5 milliuns francs. Cun questa strategia vul il chantun reducir las reservas per pudair finanziar projects impurtants per il futur. Tras quest pass sa mussa in grond minus en il rendaquint dal chantun – ma ils raps èn be vegnids spustads dad in lieu a l'auter per investiziuns futuras.
Entradas na tegnan betg pass ad expensas
Tras la reducziun dal pe da taglia da 100 sin 95 pertschient ch'è entrada en vigur il 2024 sa reduceschan las entradas da taglia. Latiers è era la gulivaziun da finanzas naziunala vegnida reducida. Da la Banca naziunala svizra ha il chantun survegnì 56,7 milliuns francs. Las expensas dal chantun èn dentant creschidas marcantamain, quai cunzunt en ils secturs da sanadad e l'agid social. Per ils proxims onns prognostitgescha il chantun era cifras cotschnas. Uschia vegn gia quintà per il 2026 cun in deficit. Era per ils onns suenter fa il chantun quint cun deficits. Il budget 2025 aveva previs in deficit da 80 milliuns.
