La citad da Cuira quinta per l'onn che vegn cun in deficit da dus milliuns francs, ha communitgà la citad da Cuira. Sco raschun dal deficit per il 2026 numna la citad ils custs che creschian en tut ils champs, la dividenda dals manaschis industrials da Cuira IBC che dettia davent sco er la revisiun da la taglia. Las expensas surpassian cun 328,5 milliuns francs las entradas da 326,5 milliuns francs.
Investiziuns planisadas
Malgrà il deficit finanzial planisescha Cuira investiziuns nettas da 47,2 milliuns francs. Puncts centrals èn la rait da chalur e fradaglia neutrala al CO2, la staziun da Cuira Vest ed il bajetg da scola Masans. Questas investiziuns pon vegnir finanziadas mo per in tschintgavel sez, radund 37,5 milliuns ston vegnir finanziadas ester.
Tenor il president da la citad Cuira, Hans Martin Meuli, n'è quest minus betg alarmant. Dapli quitads fa ad el il grad da l’autofinanziaziun. Sche quel è tar 100% vul quai dir che tut las investiziuns vegnan fatgas or da l’atgna cassa. Tenor il budget è quel dal 2026 tar 21%.
In zic bass per tut las investiziuns che spetgan, quai ha era realisà la suprastanza ed il parlament da Cuira. Pervi da quai fa la citad ina survista da la situaziun per ch’il parlament po suenter pretender sco agir. Pussaivel fissan per exempel mesiras da spargn u surlavurar la glista d’investiziuns. La finamira fiss che quest grad d'autofinanziaziun s'augmenta sin 80%.
Betg alarmant
Quest minus da dus milliuns na saja tenor Hans Martin Meuli betg alarmant. El manegia perfin che quai è in bun budget.
Jau pens ch'igl è in bun budget sch’ins resguarda las circumstanzas. Igl è ina nulla cotschna.
Sch’ins guarda numnadamain pli precis sin quest minus da dus milliuns francs n'èsi gnanc 1% da las entiras finanzas da la citad Cuira, pia entradas ed extradas.
Chargias futuras
A partir dal 2027 spetga la citad ulteriuras chargias finanzialas tras custs creschents en il sectur da sanadad, traffic public ed educaziun. Gronds projects planisads sco il teater da Cuira e la renovaziun da la halla da bogn Obere Au vegnan a strapatschar las finanzas da la chapitala grischuna.