Mardi avantmezdi han deputadas e deputads fatg curtas e tractà a moda speditiva ils detagls dal quint chantunal – remartgas n'hai strusch dà. La decisiun finala d'approvar il quint è stada unanima.
Giavisch da sbassar taglias daventa pli fervent
Administraziun e regenza han ina giada dapli survegnì bler laud per il quint ch'ha serrà cun in gudogn da record. Quai saja d'ina vart bun, da l'autra vart dentant er betg manegian cunzunt PLD e PPS. Els pretendan perquai ch'i duai vegnir discutà da sbassar las taglias. Speranza che quai pudess funcziunar dattan votums da l'AdC e da la PVL. Las duas partidas èn avertas per discussiuns. E schizunt la PS n'è betg da principi cunter sbassar taglias, i fiss tenor ella dentant meglier da dar levgiaments a quels che han da basegn e betg da principi per tuts cun per exempel sbassar il pe da taglia.
In record
Il chantun Grischun ha nudà per l'onn passà in gudogn da passa 215,9 milliuns francs. Quai èn 76,5 milliuns francs dapli che l'onn avant. En il budget aveva il chantun anc quintà cun in deficit da 9,9 milliuns francs.
Las raschuns principalas per quest resultat sajan cunzunt stads ils pajaments supplementars da la Banca naziunala cun 92,4 milliuns francs e las entradas da taglia dal chantun che sajan s'augmentadas per 91,3 milliuns francs, cumpareglià cun l'onn avant.
Ultra da quai hai er dà bler pli paucs custs entras corona, cumpareglià cun ils onns culminants da la pandemia. Plinavant sajan er las expensas stadas in toc pli bassas che previsas en il budget, cunzunt las reducziuns da las premias da la cassa da malsauns, il quint da vias e las contribuziuns d'investiziun dal chantun a terzs.
Vista en il futur
En vista al resultat da l'onn 2023 dettia gia in pèr indizis. La Banca naziunala svizra na vegn quest onn a far nagins pajaments supplementars, sco che la SNB ha gia communitgà. Las entradas da taglia pudessan restar circa tuttina. Plinavant saja da quintar cun dapli custs pervia da las premias da la cassa da malsauns bler pli autas. In augment vegnia probablamain era puspè a dar tar las investiziuns. Tuttina vegn a la fin da l'onn anc quintà cun in plus da radund 50 fin 100 milliuns francs.
