La Ems-Chemie ha envidà a Domat e radund 2'000 acziunarias ed acziunaris han dà suatientscha da vegnir a la radunanza generala. Totalmain 21 francs dividendas sa la EMS-Chemie suenter quest onn da fatschenta pajar or a las acziunarias ed als acziunaris. Quai èn 4 francs dapli che l'onn passà.
Pussaivel è quai, perquai che la Ems-Chemie ha danovamain fatg in gudogn da record da 553 milliuns francs, e quai malgrà la pandemia e la guerra en l'Ucraina che han mess l'economia in pau sin il chau.
Focus è restà sin sias spezialitads
La EMS saja sa focusada sin sias spezialitads ed haja sviluppà quellas, ha Bernhard Merki, president dal cussegl d'administraziun da la Ems-Chemie che ha manà tras la radunanza ditg. La raspada d'acziunarias ed acziunaris ha durant la radunanza er anc survegnì in'invista en intgins projects che stattan sin il plan per il proxim onn. Per exempel ha la EMS annunzià ina nova collavuraziun cun ina firma a Malaisia che producescha vonns da gumma.
Sper tschantschar da la fatschenta hai sco mintg'onn dà musica, questa giada da la chantadura da
Soul ed anteriura victura da la show «the voice of Switzerland» Nicole Bernegger. Ed ils acziunaris han er pudì laschar gustar in gentar.
