Sin il territori da la vischnanca d'Arosa duai vegnir construida ina nov'ovra idraulica. Per quest project vul il consorzi da project Wasserkraft Plessur – che consista dals partenaris l'Axpo, l'Arosa Energie e l'IBC Cuira – investir radund 80 milliuns francs. Ils trais partenaris ha uss inoltrà la dumonda da concessiun per l'ovra Pradapunt.
La nov'ovra idraulica duai vegnir realisada a la Plessur tranter Litzirüti e Pradapunt, ha l'Axpo Svizra communitgà. Ella pudess producir 42 uras gigawatt electricitad mintg'onn – quai correspunda ad energia netta per radund 10'000 chasadas ad onn. Ultra da quai pudess quest project er eliminar las grondas differenzas da deflussiun en la Plessur che l'ovra idraulica da Litzirüti chaschunia actualmain anc.
Schebain l'ovra po propi vegnir construida vegn sin il pli baud decis il 2027. L'emprim vegn la fatschenta uss ina giada tractada da la suprastanza d'Arosa.
Betg ina nova idea
Il project aveva cumenzà gia il 2014 – era però vegnì sistì dals partenaris il 2017. La raschun da lezzas uras eran las perspectivas economicas. Questa situaziun saja ussa però sa meglierada, hai num en la communicaziun.
Suenter avair giuditgà da nov la situaziun, han ins vis ch'i fiss ussa economicamain pussaivel da construir il project pervi dals mecanissems da promoziun e pervi dals pretschs d'energia.
