La decisiun dal Cussegl federal da be schluccar pauc n'ha betg fatg surstar la regenza Grischuna. Ils davos dis hajan mussà che la decisiun vegnia ad ir en questa direcziun. Tuttina avess ins spetgà dapli, han ils dus represchentants da la regenza ditg en ina conferenza suentermezdi a Cuira.
Trumpada è la regenza cunzunt che la consultaziun na para betg da mussar effect. Tut ils chantuns eran s'exprimids d'avrir las terrassas da la gastronomia a partir da glindesdi. Che questas consultaziuns na portian betg insatge en las decisiuns saja in frust. Tenor ils cussegliers guvernativs Marcus Caduff e Peter Peyer sa tschentia la dumonda sch'i portia anc insatge da trametter en consultaziun las mesiras.
Ussa saja da spetgar, vinavant testar e vaccinar. La regenza grischuna spetga dentant dapli schluccadas da Berna - surtut quai che pertutga las activitads en il liber.
