Tgi ch'absolvescha ina furmaziun da tgira, e tgi che scolescha persunal da tgira duai profitar. Quai propona la regenza per mitigiar la mancanza da persunal qualifitgà en la tgira.
Profitar duain persunas ch'èn a la scol'auta spezialisada (FH) ed ad ina scola spezialisada superiura (HF). Il sustegn finanzial duai dentant er ir a las instituziuns che scoleschan spezialistas e spezialists da sanadad AFQ (attestat federal da qualificaziun). La revisiun da la lescha correspundenta vegnia il Cussegl grond a tractar il favrer 2024, scriva la regenza. En vigur duai la lescha ir il prim da fanadur 2024.
En il Cussgel grond sesa tranter auter er Renate Rutishauser, la presidenta da la secziun grischuna da l'associaziun svizra da las tgirunzas e tgirunzs. Sco ella ha ditg al schurnal regiunal dad SRF è ella cuntenta cun la lavur dal chantun. Dentant be cun dapli pajas e dapli sustegn per instituziun e scolaziun na saja anc betg fatg tut. Per ella dovri cunzunt meglieraziuns da cundiziuns da lavur. L'associaziun lavura plinavant vid in contract collectiv chantunal per pudair s'engaschar meglier per persunas che lavuran en la tgira.
Cun la revisiun vul la regenza er metter en pratica l'iniziativa per ina tgira ferma, ch'il suveran ha approvà il 2021. La Confederaziun sa participescha cun fin 50% als custs chantunals. Tenor la lescha federala vegn l'offensiva da scolaziun promovida tut en tut durant 8 onns cun fin 1 milliarda francs tras la Confederaziun ed ils chantuns.
Entant che la Confederaziun sa restrenscha sin sustegn da las persunas en scolaziun, ha il chantun decidì d'er sustegnair las instituziuns da scolaziun. I giaja per garantir in dumber suffizient da plazzas da scolaziun per spezialistas e spezialistas da sanadad AFQ. Quintar cun sustegn pon uschia ospitals, chasas da persunas attempadas e da tgira, il servetsch da la tgira ed assistenza a chasa ed a las tgirunzas ed als tgirunzs renconuschids.
