La petiziun pretenda che luffins na vegnan betg sajettads e che la regla da sajettar ⅔ na vala betg pli. En pli na duain chatschaders e chatschadras era betg pli vegnir involvidas en la regulaziun dal luf. La regenza ha ils 4 da settember prendì enconuschientscha da la petiziun. Ella è dentant da l'opiniun ch'ina regulaziun effectiva stoppia era capitar proactivamain e preventivamain. Al giavisch da la petiziun, da desister sin la regulaziun proactiva, na vegnan ins perquai betg a suandar.
Cun questa resposta na è l’uniun «Wolfshirten» betg cuntenta. Dentant, di il copresident Marcus Duff, ch’els hajan quintà che la petiziun na vegnia betg ad avair grond effect.
Tenor ils petiziunaris e las petiziunarias saja il sajettar luffins che n'han fatg nagins donns simplamain ina chatscha da quotas. La regenza argumentescha fertant che la regulaziun saja necessaria per ch'ina convivenza tranter l'uman ed il luf è pussibla a lunga vista. Els sa basian sin la lescha federala e chantunala. Quai saja tenor Marcus Duff dentant giuridicamain ina zona grischa.
Che chatschaders e chatschadras pon sajettar lufs durant la chatscha auta e chatscha speziala n'è per l’uniun betg chapaivel. Cun be in eveniment d’instrucziun obligatoric na sappian els betg avunda davart il luf, manegia Marcus Duff. Actualmain èn quest'infurmaziun ed ina patenta da chatscha necessarias per pudair sajettar lufs creschids.
La regenza è da l’opiniun che la regulaziun na pericliteschia betg la populaziun da lufs. Marcus Duff da l’uniun «Wolfshirten» è persvadì che la protecziun da scossas e la regulaziun da lufs problematics bastassan - ils lufs na sa derasian numnadamain betg al infinit. Actualmain saja il dumber da lufs be 50% da quai ch'igl avess plaz en Svizra.
Petiziun cun passa 17'000 suttascripziuns
Il chantun Grischun prevesa da sajettar ⅔ dals lufs ch'èn naschids quest onn. Quests plans fan part da la regulaziun da la populaziun da lufs cun l'intent da controllar ella. Questa regulaziun è gia vegnida fatga l’onn passà. Lura èn 48 lufs vegnids sajettads – tranter quels er intgins luffins.
Quai vul ina gruppa cun num «Wolfshirten» impedir. Cun ina petiziun ha la gruppa rimnà passa 17'000 suttascripziuns. Concret pretenda la gruppa che chatschaders na duain betg sa participar a la regulaziun da luffins. Tar la regulaziun 2024 hajan ils chatschaders sajattà dus da total 48 lufs. E sch'i n'ha nagin effect, na stoppian ins er betg lubir quai. La petiziun metta dentant pli general en dumonda la funcziun dal sajettar luffins.
Ina lingia cotschna saja vegnida surpassada cura ch'ins ha decidì che luffins ch'han fatg nagins donns duain pudair vegnir sajettads. Er ord in punct da vista internaziunala saja il sajettar da luffins bandegià. I vegn pretendì mesiras betg mortalas per schliar problems accumpagnants. Concret vul quai dir che la protecziun da muntaneras duai vegnir rinforzada enstagl da sajettar luffins.
Studis mussan che las mesiras betg mortalas mussan effect. La regulaziun da lufs ha forsa in effect a curta vista, dentant betg a mesa e lunga vista.
La cussegliera guvernativa responsabla per la chatscha, Carmelia Maissen ha piglià encunter la petiziun e ditg ch’il luf saja dapi onns in tema fitg emoziunal. Ins vegnia ad analisar il cuntegn da la petiziun ed elavurar ina resposta. Ils petiziunaris pretendan dal rest, che quella resposta vegn uschè spert sco pussibel – avant che la proxima regulaziun cumenza.
In che vesa critic quel giavisch è il biolog Marcel Züger: