Il chantun Grischun prevesa da sajettar ⅔ dals lufs ch'èn naschids quest onn. Quests plans fan part da la regulaziun da la populaziun da lufs cun l'intent da controllar ella. Questa regulaziun è gia vegnida fatga l’onn passà. Lura èn 48 lufs vegnids sajettads – tranter quels er intgins luffins.
Quai vul ina gruppa cun num «Wolfshirten» impedir. Cun ina petiziun ha la gruppa rimnà passa 17'000 suttascripziuns. Concret pretenda la gruppa che chatschaders na duain betg sa participar a la regulaziun da luffins. Tar la regulaziun 2024 hajan ils chatschaders sajattà dus da total 48 lufs. E sch'i n'ha nagin effect, na stoppian ins er betg lubir quai. La petiziun metta dentant pli general en dumonda la funcziun dal sajettar luffins.
Ina lingia cotschna saja vegnida surpassada cura ch'ins ha decidì che luffins ch'han fatg nagins donns duain pudair vegnir sajettads. Er ord in punct da vista internaziunala saja il sajettar da luffins bandegià. I vegn pretendì mesiras betg mortalas per schliar problems accumpagnants. Concret vul quai dir che la protecziun da muntaneras duai vegnir rinforzada enstagl da sajettar luffins.
Studis mussan che las mesiras betg mortalas mussan effect. La regulaziun da lufs ha forsa in effect a curta vista, dentant betg a mesa e lunga vista.
La cussegliera guvernativa responsabla per la chatscha, Carmelia Maissen ha prendi encunter la petiziun e ditg ch’il luf saja dapi onns in tema fitg emoziunal. Ins vegnia ad analisar il cuntegn da la petiziun ed elavurar ina resposta. Ils petiziunaris pretendan dal rest, che quella resposta vegn uschè spert sco pussibel – avant che la proxima regulaziun cumenza.
Expert vesa petiziun critic
La regulaziun dal luf haja ina funcziun impurtanta, manegia il biolog Marcel Züger. Uschia possian ins tegnair sut controlla la populaziun dal luf, ma tuttina permetter trieps. Plinavant saja la protecziun da muntaneras en Grischun pretensiusa e suttapost per sbagls. Crudadas da crappa, saivs ruttas, u nausch'aura lubeschan che lufs pon entrar.
A la fin fetschia er segn sche chatschaders sa participeschan a la regulaziun. En il Vallais saja la collavuraziun tranter uffizi e chatschaders anc pli stretga. Tar l'ultima regulaziun en il Chantun Grischun han ils chatschaders sajettà dal rest dus lufs da total 48.