«Reined Cow Horse» è – declerà a moda simpla – in sport, nua che la chavaltgadra ed il chaval han da mussar lur abilitads en differentas disciplinas, per exempel en il «tegnair a mastrin» ina vatga. Quel sport vegn dals Stadis Unids ed ha ses origin en la lavur sin las «ranches», nua che la muaglia sto vegnir tschiffada cun agid da chavals.
Sin talas «ranches» ha Vera Walliser da Maiavilla passentà ina massa uras durant ses temp en l'America, nua ch'ella ha studegià lavur sociala. Per ils trais mais da las vacanzas da stad durant il studi ha ella tschertgà ina lavur – e natiralmain ha la giuvna da 20 onns da lez temp vulì lavurar cun chavals, cunquai ch'ella è gia dapi sia uffanza fascinada da quels animals.
Durant ses temp sin differentas «ranches» ha Vera Walliser er emprendì d'enconuscher il sport «Reined Cow Horse». Dapi lura na saja ella betg pli vegnida libra da sia passiun per quest sport.
-
Bild 1 von 3. Vera Walliser durant ses temp da studi en ils Stadis Unids. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Terapia cun agid dals chavals
Ella n'ha dentant betg mo ina fascinaziun per la lavur cun chaval e muaglia – mabain era per la lavur cun chaval e carstgaun. Per sia lavur da bachelor ha ella perquai elavurà in program da prevenziun per giuvenils ch'èn stads involvads cun «gangs».
I saja stà enorm bel da vesair l'effect ch'ils chavals hajan gì sin quels giuvenils. Nagin dad els n'haja mancà ina singula giada. Ultra da quai hajan ils giuvenils cumenzà a s'avrir ed a raquintar ad ella da lur problems. Quella lavur saja stada il segn per Vera Walliser che la lavur cun chaval e carstgaun saja sia clamada.
-
Bild 1 von 5. Era tar sia lavur da terapia accumpagnan ils chavals Vera Walliser. Bildquelle: RTR.
-
Bild 2 von 5. Bildquelle: RTR.
-
Bild 3 von 5. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: RTR.
Suenter ch'ella è turnada en Svizra l'onn 2012 ha ella fatg las scolaziuns necessarias – e dapi lura porscha ella differentas furmas da terapia da chavaltgar. Per ella saja quai enorm bel da vesair tge effect che chavals pon avair sin il carstgaun e co ch'els possian gidar il carstgaun.
La terapia cun ils chavals – sco er il sport cumpetitiv sin nivel aut – èn las grondas passiuns da Vera Walliser. Ella saja engraziaivla da pudair viver questas passiuns di per di.