Siglir tar il cuntegn

Header

cuntegn

Suenter temp d'uffizi Nagina carenza per mandats da cussegliers guvernativs

Per cussegliers guvernativs na datti nagin temp da carenza per surpigliar in mandat cura ch’els smettan lur uffizi. Las partidas dal center èn sa dustadas cunter l'offensiva da dretg e saniester. Sco proxim vulan deputadas e deputads dentant discutar la pensiun d'anteriurs cussegliers guvernativs.

Il Cussegl grond ha refusà in’incumbensa da la PPS che vuleva in scumond da 12 mais per anteriurs cussegliers guvernativs avant che surpigliar in nov mandat. L'impuls a questa proposta ha dà l'annunzia da questa stad ch'il cusseglier guvernativ Mario Cavigelli daventia president da la Viafier retica e cunquai proxima stad successur da Stefan Engler.

audio
Cussegl grond di Na a temp da carenza
ord Actualitad dals 18.10.2022. Maletg: RTR, Dominik Hardegger
laschar ir. Durada: 3 minutas 53 Secundas.

Allianza nunsontga – senza success

Il scumond avess pertutgà be mandats tar interpresas che stattan datiers al chantun – betg per l'economia privata. Cun in scumond fiss garantì che cussegliers guvernativs na vegnan betg en in conflict d'interess, ha argumentà il deputà Thomas Gort (PPS, Küblis).

Sustegn hai dà da la sanestra. Avant quatter onns aveva la PS inoltrà ina medema dumonda – er lura senza success. Il suppleant Lukas Horrer (PS, Cuira) ha fatg attent sin la pensiun che commembers da la regenza survegnan per vita duranta. Quella veglia gist evitar ina midada immediata suenter il temp en la regenza.

Center tegn pitg

Encunter in temp da carenza han pledà represchentantas e represchentants da l'Allianza dal Center e da la Partida liberaldemocratica. E sin lur vart è er cupitgada la Partida verdliberala che aveva avant la sessiun anc betg decis co votar.

Nagin auter chantun enconuschia in tal temp da carenza, anzi: Persunas da la regenza sajan tschertgadas per mandats e quai saja bun uschia. Plinavant saja la regenza pronta d'adattar sia pratica.

Foto dal resultat da la votaziun
Legenda: Cotschen è l'allianza da PPS e PS che ha vulì in temp da carenza – verd las vuschs dad AdC, PLD e PVL. RTR

Rathgeb sa dosta – Cavigelli tascha

La regenza grischuna empermetta d’adattar las directivas internas e quai gia ils proxims mais. Per l’ina cun publitgar sch’ina interpresa che stat datiers al chantun tschertga persunal e per l’autra da betg communitgar sch’in cusseglier guvernativ vegn elegì anc durant ses temp d’uffizi.

Er l'annunzia che Mario Cavigelli duai surpigliar in mandat tar la plazza aviatica a Samedan è stà tema. Sin la dumonda sch'i dettia anc dapli elecziuns ha il cusseglier guvernativ Christian Rathgeb respundì: «Quai è ina dumonda difficila. Cler ch'ins s'orientescha vers l'avegnir a la fin d'in uffizi – er jau. Tant sco jau sai na datti dentant naginas elecziuns fixas – surtut naginas che fissan pertutgadas da questa debatta».

Il cusseglier guvernativ ha persequità la debatta en sala. El n'ha dentant betg vulì prender posiziun sin dumonda da RTR. Christian Rathgeb represchentia la posiziun da la regenza.

Uss vegn la pensiun vidlonder

La debatta davart il temp suenter l'uffizi en la regenza n'è dentant betg a fin. La PPS ha inoltrà ina proposta per stritgar cumplettamain la pensiun che anteriurs commembers da la regenza survegnan – la PLD vul stritgar quella cura ch'in cusseglier guvernativ cuntanscha la vegliadetgna da pensiun.

Quai di la lescha

Avrir la box Serrar la box

La pensiun (Ruhegehalt) che cussegliers guvernativs survegnan suenter lur uffizi è descritta en artitgel 8 da la lescha davart ils salaris:

1 Suenter l'extrada or da la regenza exista in dretg supplementar sin ina pensiun per vita duranta. La pensiun importa per mintga onn d'uffizi 3,5 pertschient dal salari ch'è vegnì retratg sco ultim. Mintga onn d'uffizi cumenzà quinta sco onn cumplain.

2 Sch'ina anteriura commembra u sch'in anteriur commember da la regenza realisescha in'entrada da gudogn che surpassa – ensemen cun la pensiun – il salari annual d'ina commembra u d'in commember en uffizi, sto la pensiun vegnir reducida per l'import supplementar. Prestaziuns or da la prevenziun professiunala valan sco entrada da gudogn, e quai per la valur da la renta.

RTR novitads 10:00+

Artitgels legids il pli savens