La Banca Chantunala Grischuna resta sin la via da success. Sco ella communitgescha, hai dà ils emprims sis mais da l’onn in plus da 3,1 pertschient tar il volumen d’affars. Quel munta uss a 62,4 milliardas francs. En il sectur d’ipotecas è la banca chantunala creschida per 1,3 pertschient sin 19 milliardas francs.
Sut il stritg ha la banca fatg in gudogn da 103,4 milliuns francs – quai è in minus da 7,7 pertschient cumpareglià cun la medema perioda da l’onn passà. En emprima lingia saja quai pervi da las correcturas als martgads da chapital, scriva la banca chantunala.
Prognosa stabila
La Banca Chantunala Grischuna conferma en sia communicaziun las spetgas per l’entir onn da gestiun. Ella quintia vinavant cun in gudogn da radund 195 milliuns francs. Quai sch’ils martgads d’aczias possian sa revegnir levamain, e sche la Banca Naziunala Svizra decidia ulteriurs pass en connex cun il tschains directiv.
Nova firma Avalur SA
La Banca Chantunala Grischuna s’engascha cun ina cumpart da minoritad vid la firma Avalur SA. Quella duai organisar ina rait economica che porscha servetschs per firmas pitschnas e mesaunas, las uschè numnadas KMU. Sco la banca chantunala scriva, duai la Avalur en in’emprima fasa cussegliar firmas areguard ristgs ed assicuranzas. Pli tard duessan vegnir vitiers per exempel servetschs areguard dumondas da dretg e servetschs d’administraziun fiduziara.
