Il Cussegl grond ha approvà la revisiun parziala da la lescha da taglia chantunala per distgargiar sistematicamain las famiglias ed ils pèrs maridads cun pajas dublas. I dat en quest connex augments tar differentas deducziuns:
- La deducziun per ils custs per la tgira d'uffants tras terzas persunas s'augmenta da 10'000 francs a 25'000 francs.
- La deducziun per pèrs maridads cun duas pajas s'augmenta da 500 francs a 2'000 francs.
- I duai dar augments substanzials da las deducziuns per uffants.
Questas mesiras n'han betg mo la finamira da sbassar la taglia per famiglias u pèrs maridads cun duas pajas, mabain er da posiziunar il chantun Grischun sco lieu attractiv per famiglias. Las novas regulaziuns van en vigur il schaner 2026.
Nus avain ina situaziun da partenza finanziala solida e buna.
Pertge ina revisiun da la lescha da taglia?
Il motiv per questas midadas è stada ina incumbensa dal Cussegl grond ch'è vegnida inoltrada il settember 2022 dal deputà Oliver Hohl (PLD). In prim pass per realisar quai è stà la reducziun dal pe da taglia da 100 sin 95% ch'è vegnida concludida dal Cussegl grond en la sessiun da december 2023.
L'entira distgargia da taglia che vegn cuntanschida tras la revisiun parziala da la lescha importa 75 milliuns francs per onn. Il chantun vegn a surpigliar passa dus terzs da questa distgargia.