Siglir tar il cuntegn

Header

cuntegn

RTR ha accumpagnà Festa da chant ha unì generaziuns

Sin l'areal da la festa da chant a Gossau s'inscuntran chors da tut las generaziuns. RTR ha accumpagnà il Chor viril da Falera cun la dirigenta Heidi Casutt ed il Chor da giuvenils grischun ch'han omadus fatg bunas prestaziuns.

Chor da giuvenils grischun

Las chantaduras ed ils chantadurs dal chor da giuvenils grischun èn viagiads a Gossau per mussar als experts ed expertas ed al public lur savair. Per la gruppa da bunamain 40 giuvens èsi enorm bel da puspè vegnir ensemen ad ina feste pudair chantar e giudair il temp.

audio
Gossau: Chor da giuvenils – chant unescha generaziuns
ord Actualitad dals 30.05.2022.
laschar ir. Durada: 4 minutas 15 Secundas.
Dar concerts, transmetter emoziuns ed istorgias ed armonisar ensemen, quai è bel.
Chantadura dal chor da giuvenils grischun

Il chor ha dà ses meglier ed uschia survegnì la nota sis per lur chant. Sper la buna nota èsi bel per ils commembers dal Chor da giuvenils grischun ch'il chant unescha generaziuns - giuven enfin vegl. Blers chors han commembras e commembers pli vegls, ils giuvens grischuns, speran da pudair transmetter lur passiun per la musica a generaziuns pli giuvnas.

Chor viril da Falera

Heidi Casutt è dapi onns la dirigenta dal Chor viril Falera. Ella para d'avair in bun maun per diriger ils umens e sa exact cura ch'els drovan pleds clers e cura plitost motivaziun. Per Gossau, han els exercità bler ed a la fin a la lavur valì la paina. Il chant da Falera è vegnì valità cun la nota sis.

video
Festa da chant a Gossau – il chor da Falera
Or da Telesguard dals 27.05.2022.
laschar ir. Durada: 6 minutas 2 Secundas.

Trais chanzuns avant publicum ed avant experts. Uschia è vegnì giuditgà quant buns in chor è. Dus experts han tadlà e valità. El cass dal Chor viril Falera han els fatg quai cun ina nota. Ils chors hajan pudì giavischar schebain els vulan ina nota u sulet in pariri.

Suenter blers mais da lavur han ils chantadurs e la dirigenta Heidi Casutt gì grond plaschair da questa nota. Il di da festa è passà spert. L' arrivada a Gossau, survegnir emprimas impressiuns e curt anc mangiar ina liongia avant che chantar en. L'ura era schon il mument da la preschentaziun arrivada. Per blers sco in exercizi, per auters cun in zic sguzias el magun.

Festas da chant èn dentant era lieu d'inscunter per fitg bleras chantaduras e chantadurs. In lieu per parter in hobi, ina passiun.

RTR Telesguard 17:40

Artitgels legids il pli savens