Svilup istoric
Enfin la fin dal 19avel tschientaner era la vita a Cuira drizzada envers la citad veglia. Il 1858 è la lingia da viafier Cuira-Rheineck vegnida construida. Quai ha lantschà il svilup dal Quartier dal Rain. Enfin lura era il quartier ina zona d'agricultura. L'emprima chasa da pliras famiglias a Cuira era il Titthof, ch'è vegnida construida il 1870 en la part sura dal Quartier dal Rain.
Dal 1900 enfin il 1950 è la populaziun da Cuira sa dublegiada da 10'000 sin 20'000 abitantas ed abitants. Quai pervia da la prosperitad economica da Cuira. Bleras persunas èn vegnidas ord las valladas grischunas a Cuira per lavurar. Dapli persunas muntava dentant era ch'i dovra dapli spazi da viver. Cunquai ha il Quartier dal Rain cumenzà a sa midar pli e pli fitg dad ina zona agricula tar in quartier d'abitar. Da quest temp è era l'auto arrivà a Cuira. Malgrà ch'igl era enfin il 1925 scumandà da charrar cun auto en il Grischun, era quai a Cuira gia lubì. Cun ils autos che han conquistà la citad, è era il basegn da dapli planisaziun creschì. Uschia è lura l'idea da la Ringstrasse naschida. Cun la Segunda Guerra mundiala è la construcziun da quella dentant sa retardada.
Suenter la guerra è la populaziun da Cuira creschida vinavant, e l'infrastructura vegn schlargiada adina pli fitg. Il 1960 ha la citad decidì davart ina lescha per la construcziun da chasas autas. Lura è era la Ringstrasse vegnida bajegiada e curt suenter l'autostrada A13. Adina dapli chasas autas vegnan construidas, era en il Quartier dal Rain. Ina maschaida da chasas autas, chasas d'ina famiglia e abitaziuns da societads cooperativas daventan tipic per il Quartier dal Rain.
Oz viva prest la mesadad da la populaziun da Cuira en quest quartier, ch’è il pli grond quartier d'abitar da la citad. Vi da la zona agricula d’avant 1900 regordan sulettamain singuls bains purils, sco per exempel quel en la via da la Untere Plessurstrasse tar il «Schelmenbrüggli».
Il Quartier dal Rain en 3 parts
Cunquai ch'il Quartier dal Rain è uschè grond, discurra la citad da las trais parts I, II e III. Il Quartier dal Rain I sa chatta sut la staziun da Cuira e cunfinescha cun la Plessur, la Ringstrasse e la Via da Masans. Il Quartier dal Rain II è sut la Ringstrasse e ha ils cunfins tar il Rain, la Plessur e la Scalettastrasse. Il Quartier dal Rain III è era sut la Ringstrasse tranter la Scalettastrasse e la Via da Masans enfin tar il Rain.

La populaziun
En il Quartier dal Rain abitescha prest la mesadad da la populaziun da Cuira, numnadamain varga 18'000 persunas. En il Quartier dal Rain II ch'è en il focus da nossa rapportaziun abiteschan bun 7'200 persunas (cifras da la citad dal 2019). In quart da las persunas che abiteschan là, han lur ragischs en l'exteriur. En il Quartier dal Rain II datti duas unitads da scola cun scola primara e scoletta: Rheinau e Barblan. Quellas dumbran en tut 550 scolaras e scolars.