Siglir tar il cuntegn

Header

audio
Reavertura dal territori da skis San Bernardino
Or da Actualitad dals 09.01.2024. Maletg: RTR
laschar ir. Durada: 2 minutas 51 Secundas.
cuntegn

San Bernardino Territori da skis Confin – la renaschientscha suenter 12 onns

Ils ultims 12 onns han mancà ils raps per sanar il territori da skis Confin a San Bernardino. Dapi ils 27 da december 2023 èn parts puspè avertas ed attiran blera glieud.

Surtut glieud dal Tessin e dal nord da l’Italia èn sin las pistas a San Bernardino. L'hotelier, Hans Peter Wellig, ha l’impressiun ch’igl è sco pli baud. Ch'i ha tanta glieud ed uschè blera lavur sco avant in per onns. El è dentant cuntent cun quai.

Il motiv ch'il territori ha avert suenter 12 onns è l'investider ed impressari tessinais Stefano Artioli. El ha cumprà la stad passada la pendiculara ed era il restaurant. Alura sanà tut entaifer sis mais ed avert curt suenter Nadal. Sia visiun per San Bernardino e per il territori da skis Confin è la suandanta:

  • Ina destinaziun ch’ha avert tut l’onn
  • In hotel da tschintg stailas cun in bogn termal
  • 300 chombras da hotel
  • 263 abitaziuns da vacanzas
San Bernardino
Legenda: En la vischnanca San Bernardino ins senta il cumenzament da questa visiun: i ha plirs plazzals da construcziun RTR

En la vischnanca sez badan ins questa midada, igl ha plirs plazzals da construcziun. Ed a l’entrada da San Bernardino hai in placat cun scrit si «L’inizio di una nuova storia.»

Entant han ils giasts gust vi dal territori da skis. Ina sportista di ch’ins na sto betg spetgar ditg per dumagnar sin il lift. In'autra di ch’ella è creschida si qua e giauda da puspè esser qua. In bab da famiglia di ch’i saja bun per famiglias ed in ulteriur um è surstà che tanta glieud è en la vischnanca San Bernardino.

Stefano Artioli ha cumprà plirs hotels e chasas en il center da San Bernardino. Tenor SRF è ses plan grond da bajegiar in ressort cun hotel e bogn termal. Er la funtauna termala veglia Artioli cumprar.

Artitgels legids il pli savens