A San Vittore hai danovamain dà ina arrestaziun en connex cun uschenumnads telefons da schoc. La Polizia chantunala è vegnida infurmada mardi avantmezdi d'in um che sia dunna saja al telefon cun in cugliunader. Sin basa da questa annunzia ha la polizia pudì controllar la surdada a San Vittore. Il currier saja lura vegnì arrestà a Castione en il Tessin. Sco la Polizia chantunala dal Grischun scriva, saja quai succedì en collavuraziun cun la polizia tessinaisa. Tar l'arrestaziun saja vegnì confiscà ils daners e la bischutaria ch'èn vegnids surdads.
Gia il venderdi aveva la polizia arrestà a San Vittore ina cugliunadra ch'aveva empruvà la medema mascha.
Ina dunna aveva cugliunà ina seniora ch'ha pers tras quai objects da valur e daners per in import da tschintg cifras. Sco la Polizia chantunala scriva vegnan era delicts en il Tessin renfatschads a la dunna. La cugliunadra aveva telefonà a la seniora e ditg che sia nezza ha gì in grev accident d’auto a Lugano. Ella possia evitar in chasti en praschun be cun pajar ina cauziun. Suenter era ella lura vegnida a prender ils daners. En collavuraziun cun la Polizia chantunala dal Tessin è reussì d’arrestar in di pli tard la dunna polacca da 34 onns. La dunna sa chatta en arrest d’inquisiziun.
