La fin fanadur è vegnì enconuschent a Val in cas dad ina chaura ad alp ch'ha gì paratuberculosa. Tenor l'Uffizi veterinar chantunal sajan cas da paratuberculosa ad alp dentant in'excepziun. Autras malsognas vegnian dentant adina puspè avant sporadicamain. Claudio Paganini, il veterinari chantunal substitut dal chantun Grischun di dentant, che quest onn saja plitost in ruassaivel.
Malsognas infectusas sin manaschis d'alp
Avrir la boxSerrar la box
palusa bletscha (Moderhinke)
Ina malsogna bacteriala dad unglas. Ils sintoms principals èn cotschnurs en las sfessas tranter las unglas, pli tard inflammaziuns da las unglas e paralisa parziala. La palusa bletscha vaglia sco la pli derasada ed economic remartgabla malsogna da nursas.
ectima contagius (Lippengrind)
Ina malsogna sumeglianta a la virola che sa furma en la regiun da la bucca, l'iver e tar ils pes, dentant era tar la pel mucosa da la bucca e dal buttatsch. Quella malsogna survegnan cunzunt nursas.
tschorvadad da chamutschs (Gämsblindheit)
Ina malsogna che dat ina infecziun da la congiuntiva e da la pel dira, pia ina infecziun dals egls. En cas gravants san ils animals daventas tschorvs. Nursas, chauras, chamutschs e capricorns san tschiffar questa malsogna.
paratuberculosa
Ina malsogna bacteriala cronica che fa vegnir fitg magher e maina la fin finala a la mort. Blers animals san esser sur plirs onns purtaders da la malsogna senza avair sintoms clinics. Per questa malsogna da datti nagina terapia, ils animals pertutgads ston vegnir durmentads.
funtauna: Veterinärdienst Luzern / Vet Suisse Uni Bern
La tschorvadad da chamutsch vegnia avant var dus enfin quatter giadas l'onn, quest onn hai dà duas annunzias. La palusa bletscha ed l'ectima contagius n'èn betg obligatoricas dad annunziar tar il chantun – perquai n'han els era betg cifras concretas quant savens che quellas malsognas existan.
In aspect che pertutga surtut il Grischun sco chantun da cunfin saja, ch'i regia in auter status areguard intginas malsognas d’animals che en ils pajais cunfinants. Uschia savess in contact cun muvel ester daventar problematic e sto uschia vegnir regulà en cas critics.
