Durant in’emna vegnan ensemen tut las persunas che fan lur emprendissadi en ospitals, chasas d’attempads u psichiatrias. En il center da furmaziun da sanadad e social BGS a Cuira vegnan las emprendistas ed ils emprendists ensemen e discutan davart lur lavur.
Adelin Berther dat scola en quest sectur ed ha organisà quest’emna perquai ch’ella vul dar sustegn a las persunas giuvnas. Cun circa 16 onns cumenzas questas persunas lur emprendissadi che po propi esser emoziunal e pretensius.
Jau hai giu in onn ina classa nua che 20 giuvnas e giuven eran sez en la psichiatria e quai m'ha fatg trista.
Ella ha vis il basegn da sustegnair las persunas giuvnas durant lur emprendissadi ed organisà l’emna da project.
Dus giuvnas che san sco ir enturn cun squitsch e pretensiuns
Lorena Wolf ha 16 onns, lavura en la chasa d’attempads Sogn Giusep a Cumpadials ed ha era gia gì situaziuns ch’èn idas datiers ad ella. Per exempel ina pazienta ch’è dementa. Ella na saveva betg pli nua ch’ella è e Lorena Wolf n'ha al cumenzament betg savì sco ir enturn cun questa situaziun.
Jau n'hai betg savì che demenza po esser uschè brutal. Ch’ins na sa nagut pli da sasez, gnanc cura ch’ins ha natalizi.
Suenter ha la giuvna emprendì sco ir enturn cun quai. Ella scriva si per la pazienta nua ch’ella è e discurra plaun e cler. Ch'i dat talas situaziuns durant l’emprendissadi è dentant stà cler per Lorena Wolf.
Lara Carigiet fa ses emprendissadi en l'ospital a Glion. Là vesa ella era blers cas da persunas che pateschan. Ella ha chattà ora per sasez, ch'i gida da laschar ils problems en il ospital cun il resto ch’ella tira ora là. Per ella è il team enturn ella impurtant ed ella emprenda bler da sias collegas.
Durant l’emna da project per la sanadad psichica ha ella emprendì da trair il flad e prender temp, forsa ir or a l’aria frestga in mument per sasezza cura ch'igl è stressant. Las dus giuvnas discurran regularmain davart la sanadad psichica e per ellas è quest tema nagin tabu.