Suenter la plievgia ferma la notg è curt avant las 07:00 sa distatgada ina bova radund 150 meters sur la via da la Val Calanca. Var 50 meters cubic material èn glischnads a val. Singuls blocs gronds èn rudlads fin tar la via sin il traject tranter la punt artgada sur la Calancasca e Molina.
Ina scalgia d'in crap haja lura tutgà il viertgel dal motor d'in auto, sco ch'e l'Uffizi da construcziun bassa dal Grischun scriva. Il manischunz n'è betg vegnì blessà ed ha pudì cuntinuar il viadi senza ulteriur agid. Vi da l'auto haja dà in donn material da radund 1'000 francs. La cuvrida da la via è vegnida donnegiada levamain.
Segirar il traffic
Pervia da la plievgia cuntinuanta e pervia da la tschajera saja l'emprim giudicament dal privel stà pussaivel pir venderdi da mezdi. Tenor il giudicament d'in geolog saja la segirezza per il traffic garantì, uschia ha l'Uffizi da construcziun bassa avert la via a las 16:00 sut la cundiziun ch'ella vegn survegliada.
Las notgs da venderdi fin dumengia resta la via mintgamai tranter las 20:00 e las 07:00 serrada per il traffic. Tut tenor aura restan questas mesiras previsiblamain en vigur fin glindesdi marvegl a las 07:00.
Il lieu da distatga da la bova actuala sa chatta var 200 meters sut il lieu da distatga da la crudada da grippa dal december 2022.
