La «Schlagerparade» è in dals pli gronds eveniments a Cuira. Ella celebrescha la musica da schlagher dals onns 60’, 70’ e 80’ ed è ina festa per tut las vegliadetgnas. L’event cumpiglia dus dis da concerts ed in grond til tras la citad. La «Schlagerparade» ha adina lieu l’ultim venderdi e l'ultima sonda dal mais settember.
L'organisaziun per in dals pli gronds eveniments da Cuira
Gia dapi l'onn 1997 vegn organisà il grond eveniment da la «Schlagerparade». En la citad vegn gia dapi l'entschatta organisà in grond til da vehichels da hossa ed en la halla da citad datti dapi l'onn 2018 ina gronda festa da schlagher. Ils emprims onns aveva la parada da schlagher enturn 4'000 aspectaturs ed aspectaturas. Oz attira la parada mintg'onn 35’000 persunas da tut la vegliadetgna.
La differenza tranter las persunas è gronda. I da l'uffant dat trais onns che guarda tiers ils hossamobil e che sa legra sin las coccas. I dat la dunna da 90 onns che sa vestgescha puspè sco pli baud ed i dat ils giuvenils che vegnan la saira per far festa.
Il grond til cun ils vehichels da hossa
La ruta dal til cumenza sin l'Alexanderplatz e maina ils vehichels tras la Grabenstrasse fin a la «Stadthalle». In dals 20 vehichels da hossa che fa cun al til da quest onn, è vegnì decorà da la gruppa «Schlagerfreunde Felsberg».
Quai ch'è impurtant, èn quels temps nua che ti es ensemen cun tes amis.
La gruppa da Favugn ha decorà lur Hossamobil cun il motto «Gianna – Rino Gaetano». L'idea per quel motto saja per cas vegnida endament durant ina saira cura che la gruppa è sesida ensemen.
In'emna avant il grond til è la gruppa «Schlagerfreunde Felsberg» vegnida ensemen ed ha cumenzà a decorar lur hossamobil. I na giaja betg per construir il meglier hossamobil. Il pli bel durant il decorar saja dad esser ensemen e d'avair in bel temp. Er suenter il til giaudia la gruppa da Favugn la cumpagnia ensemen.
-
Bild 1 von 3. il motto dal hossamobil «Gianna – Rino Gaetano». La gruppa da Favugn ha decorà lur hossamobil en il stil talian. Bildquelle: RTR.
-
Bild 2 von 3. Il hossamobil da davant. Bildquelle: RTR.
-
Bild 3 von 3. Il pli impurtant per Victor Flepp è il temp cun ses amis, durant ch'els decoreschan il hossamobil. Bildquelle: RTR.