Siglir tar il cuntegn

Header

audio
PHGR: dapli annunzias e dapli custs chaschunan problems
Or da Actualitad dals 04.08.2023. Maletg: RTR
laschar ir. Durada: 3 minutas 9 Secundas.
cuntegn

Scola auta da pedagogia GR Massa annunzias, paucs raps – in credit supplementar duai gidar

La scola auta da pedagogia grischuna ha survegnì per il nov onn da studi annunzias da record. En tut 245 persunas cumenzan il settember in studi. Quai èn 60 studentas e students dapli che budgetà. Quai è collià cun sfidas. Ussa vul il chantun però reagir.

Il departament chantunal d'educaziun vul ussa reagir e pretender in credit supplementar per la finanziaziun da la Scol'auta da pedagogia dal Grischun. Suenter ch'i ha numnadamain dà dapli annunzias che budgettà per ils studis da quest onn. Quai dovra però era dapli persunal e dapli infrastructura, uschia ch'il departament aveva l'emna passada anc quintà cun in deficit dad 1,5 milliuns francs. Tenor il cusseglier guvernativ Jon Domenic Parolini duai in credit supplementar far remedura ed almain neutralisar quest deficit – e quai gia per quest onn.

Quai è per nus cler ch'igl è dad agir. Ins sto vegnir cun in credit supplementar en la regenza, e suenter en la cumissiun da gestiun per auzar las finanzas a disposiziun.
Autur: Jon Domenic Parolini Cusseglier guvernativ GR

Per il rectur da la Scol’auta da pedagogia grischuna Gian-Paolo Curcio munta quest success tar las annunzia era sfidas senza fin. Sfidas ch'ins ha pudì schliar mo per part - i dovra dapli persunal, infrastructura e daners. Tar il persunal hajan ins chattà schliaziuns cun auzar pensums e cun engaschar nova glieud.

audio
Gian Paolo Curcio davart la reacziun da docentas e docents
ord RTR Audio dals 04.08.2023. Maletg: Scola auta da pedagogia grischuna
laschar ir. Durada: 25 Secundas.

Tar l'infrastructura saja la scola a la tschertga da novas localitads en la citad da Cuira. Qua sajan ins sin buna via, declera Gian-Paolo Curcio. Las finanzas sajan dentant anc ina giada in'autra sfida. Il budget per quest onn saja gia vegnì fatg avant bun in onn a mez. E lura n'hajan ins betg pudì savair ch'il dumber d'annunzias giaja taluisa ensi, declera il rectur da la scola. I na saja pia nagin sbagl strategic.

Quai n'è betg stà d'anticipar che la dumonda vegn ad esser uschè gronda per far in studi a la Scola auta da pedagogia grischuna.
Autur: Gian-Paolo Curcio rectur da la Scola auta da pedagogia grischuna

60 students e studentas dapli custan

In student a la Scola auta da pedagogia a Cuira custa en media 30'000 francs ad onn. Munta uss pia ch'i dat custs supplementars per la scola das 1,8 milliuns francs. Per minimar la sperdita vegn perquai actualmain spargnà en scola. Munta concret per exempel, ch'i na dat quest onn nagina furmaziun supplementara pli per il persunal. Ni era che differents projects vegnan spustads u terminads. La fin finala quinta la scola sin la fin da l'onn cun in deficit da radund 1,5 milliuns francs.

Betg tut ils studis cun annunzias da record

audio
Studi parzial a la PHGR – blers han chalà
ord Actualitad dals 05.08.2023. Maletg: RTR
laschar ir. Durada: 2 minutas 14 Secundas.

Dapi l’onn passà porscha la scola er in studi parzial che sa drizza surtut a persunas che lavuran dasperas. Enstagl da trais onns, vegn il studi absolvì en quatter onns. Da las 17 persunas che han cumenzà il studi l’onn passà, èn uss dentant mo pli 10 da la partida. Sco las retschertgas dad RTR mussan, argumenteschan persunas ch'han chalà cun il studi che precis dumagnar studi, lavur e famiglia sut il medem tetg saja il problem. Il rectur è dentant persvas che quai laschia coordinar cun lur purschida.

RTR actualitad 12:00

Artitgels legids il pli savens