La Scol’auta da pedagogia dal Grischun ha registrà in record tar las annunzias per la furmaziun da magistras e magisters. Sco la scola scriva èn var 200 persunas annunziadas per far il studi da bachelor per la scolina e la scola primara. Quai sajan bunamain 35% dapli che l’onn avant ed uschè bleras sco anc mai. Il dumber da studentas e students rumantschs è cun 18 annunzias per il 2022 restà en il rom dals ultims onns (2019-2021 mintgamai 17 studentas e students).
Nova purschida da furmaziun
Tenor il rectur Gian-Paolo Curcio sajan ils motivs tranter auter il svilup dals differents studis. Da nov datti in studi cumbinà tranter scolina e scola primara. Er in dals motivs saja ch’igl è da nov pussaivel da far il studi sco magistra e magister da scola primara er a temp parzial, quel va lura otg semesters enstagl da sis semesters a temp cumplain.
Il nov studi che cumbinescha il stgalim da scolina ed las primas duas classas primaras remplazza il studi singul da scolina ch'i deva fin qua.
Nov studi da master per magistras e magisters dal stgalim secundar
L'emprima giada suenter las vacanzas da stad cumenza il studi parzial da master per magistras e magisters dal stgalim secundar 1. En l'entira Svizra Orientala na datti nagut ch'è cumparabel. Il studi sa drizza a persunas che han gia fatg in bachelor u master tar in'universitad u tar ina scola auta. E quai en in rom da la scola populara sco per exempel tudestg, natira e tecnica u er auters sco sport u matematica. Per il semester che vegn èn 11 persunas s'annunziadas per quest studi.
Annunzias na mussian anc betg il dumber effectiv dals students
Las annunzias sajan dentant per regla pli autas ch'il dumber da studentas e students che cumenzan propi il studi.
Tenor experientscha è il dumber da las studentas e students a l'entschatta dal studi 15-20% pli bass ch'il dumber d'annunzias.
Quai saja perquai che betg tut las persunas adempleschian las cundiziuns d'admissiun. E per part datti persunas che s'annunzian tar pliras scolas. La PHGR quinta la fin finala cun 160-170 studentas e students che cumenzan il studi da bachelor il settember.
