La Scola chantunala grischuna a Cuira ha pudì persvader la giuria ina segunda giada cun sia purschida multifara en ils secturs da MINT, pia la purschia en las scienzas natiralas, la tecnica e la matematica. En il rom da l'inscunter dals gimnasis activs en ils secturs da MINT il matg 2024 a Berna ha ella pudì prender encunter il label per ulteriurs 5 onns. Quai scriva la Scola chantunala grischuna en ina communicaziun.
Il label da scolas activas en la sparta da MINT datti dapi il 2018. La finamira è da promover quels roms da scola e da meglierar la collavuraziun tranter las scolas participadas.
Purschida multifara vegn onurada
La Scola chantunala grischuna ha survegnì il label per ils onns 2024 fin 2029 en spezial per sia promoziun vasta, per l'instrucziun orientada a la pratica ed a l'applicaziun, sco er per ses engaschi spezial en ils roms geografia e geologia. Ultra da quai tgira la pli gronda scola media dal Grischun ina cultura da concurrenza prosperaivla. Ella sa legra regularmain da lavurs da maturitad premiadas d'instituziuns naziunalas sco «Scienza e giuventetgna» u da premis en concurrenzas chantunalas, sco per exempel da la Societad grischuna per la perscrutaziun da la natira. A chaschun d'emnas tematicas, da roms facultativs e da lavurs interdisciplinaras en ils secturs da MINT survegnan las scolaras ed ils scolars la pussaivladad da s'approfundar en in tema, tut tenor l'interess. En la scola vegnan organisadas regularmain occurrenzas, sco il favrer 2023 il TecDay, u referats da scienziadas e scienziads da la natira renumads, sco il november 2023 da l'anteriur directur da la NASA Thomas Zurbuchen. Questas occurrenzas sensibiliseschan las scolaras ed ils scolars supplementarmain per dumondas actualas en ils secturs da MINT.
Sco part da la rait dals actualmain 33 gimnasis activs en ils secturs da MINT profitescha la Scola chantunala grischuna da diversas activitads da barat cun autras scolas medias e da programs tranter scolas en Svizra ed a l'exteriur.